爸爸夠威嚴，囝囝夠精靈，呂良偉與囝囝呂善揚日前以父子裝現身淺水灣大展球技，他們同樣身穿綠色T恤，四個骨褲配上波鞋，外形打扮襯到絕之餘，其實兩父子最相似的地方，是同樣擁有剛強的性格，受軟不受硬，兩父子在比拼球技時更是你一言、我一語，合拍程度爆燈，果然虎父無犬子。 撰文：陳寶明
呂良偉家住淺水灣附近，一有空閒時候，他便會帶囝囝呂善揚到淺水灣沙灘一同堆沙，或到附近空地踩單車及踢足球，不過阿呂太太楊小娟為了保持白皙膚色，避免在烈日當空下暴曬，一向甚少踏足沙灘，故沙灘便成為阿呂兩父子互動的好地方。
屢出茅招還以顏色
日前兩父子到淺水灣玩耍，發現像阿呂這樣的大男人，當面對囝囝時也有柔情一面，大家又不時為對方抹汗。阿呂接受訪問時說：「個仔6歲啦！佢好好動，尤其鍾意踢足球。」兩人在踢波時，不要小覷揚揚人仔細細，但腳力驚人，可以一腳將波踢到老遠，真是勁力十足，這對父子兵上場大家也不留情，在踢波期間，阿呂一時錯手踢中揚揚的手指，年紀小小的揚揚並沒有喊，反而嚇得阿呂即時上前看究竟，阿呂摸着兒子小手笑說：「你都冇喊，即係冇事啦！」
不過不服氣的揚揚卻以凌厲眼神「射」住爸爸，阿呂則得戚地笑囝囝，揚揚不忿地說：「我冇力踢呀！」
阿呂用激將法指他手指受傷又不是腳受傷，為何腳仔會沒有力，在這一激之下，揚揚小休過後，即回復狀態，今回囝囝還以顏色，不惜對爸爸大出茅招，用小手不停拉扯爸爸的衫褲兼踢腳，阿呂與囝囝的相處煞是輕鬆。
講故事讀報增思維
阿呂是一個甚反對體罰的家長，他說：「我對佢唔似對住個仔，我哋會用幽默同輕鬆方法相處，除非佢犯上好嚴重嘅錯，咁打一兩下，係等佢有啲痛，先記得唔好再犯同樣嘅錯，不過佢咁大，我都係只打過佢一次，我會同佢講打你罰你，係愛佢嘅表現，如果唔係使乜理你呀，我又教佢要有禮貌，所以佢啲禮貌都OK㗎，我又同佢講幸福非必然，做人要感恩，養不教係咩呀！」阿呂問揚揚，他即時答上說：「父之過！」阿呂又問：「咁教不嚴呢？」揚揚又答上說：「師之過。」兩仔爺好似唱雙簧一樣。
阿呂覺得親子關係絕對是一門學問，他說：「我會講故事𠱁佢瞓，只要唔使開工，我晚晚講故事畀佢聽，好似講阿拉丁神燈、三國演義咁，佢讀幼稚園開始，我已經同佢講故事，呢啲係溝通方法之一。」
筆者問揚揚怕爸爸還是怕媽媽？揚揚眼睩睩望一望爸爸，阿呂笑說：「小心啲講。」揚揚用手指一指爸爸，阿呂說：「佢受軟唔受硬，總之唔能夠硬碰，而且每件事最好係預先同佢講，我要畀佢知道世界上無不是嘅父母，只有不孝兒，我會以日常生活中嘅真實事件嚟做教材，好似啲爭產案件咁，都係活學教材，喺新聞上嘅例子比書本上更真實，所以我都會讀報紙畀佢聽。」
訓練耐性鼓勵身教
有很多父母也渴望子女成材，揚揚是阿呂的獨子，他當然希望兒子成大器，阿呂說：「我唔會逼佢嘅，揚揚嘅契爺係土木工程專家，我又有個發明家朋友，揚揚成日同佢哋傾偈，佢好鍾意發問問題，有啲知識係書本上學唔到嘅，因為唔能夠讀死書，為咗個仔我自己都有耐性咗，而且要識得身教。」阿呂覺得人之初，性本善，一個人出世是善良的，不過要視乎日後如何教育，這個重責不只是父母，甚至是整個社會風氣也很重要。
育兒心得：周遊列國四語齊發
放眼世界是呂良偉與太太楊小娟教導兒子的方法之一，在兒子出世後不久，他們便與兒子周遊列國，早前他們便一家三口坐郵輪出埠暢遊，他們先由香港出發往上海，然後是日本及韓國，最後從上海返港，行程約一周。
小娟日前接受電話訪問說：「多啲帶個仔出外，可以令佢增廣見聞，佢出世無幾耐就去旅行，走過大半個地球，佢見識多咗，成個人都淡定晒，佢國語同英文都OK，同佢溝通都冇問題，佢好鍾意講嘢，佢識4種語言，仲有四川話，我同阿呂都好畀心機去教佢，家庭教育好重要，大部份時間都畀佢。」
就讀中文學校
小娟又覺得讀書要打好基礎，所以她不安排兒子入讀國際學校，她認為讀中文學校較嚴格，而且她希望兒子有良好的中文底子。至於教育方法，小娟笑說：「我哋三個好friend，會一齊傾心事，令囝囝學識點樣去同人溝通，要識去分享開心，仲要學識控制情緒，不過佢都好乖，唔使我勞氣，佢比較怕爸爸，因為阿呂有時都幾嚴格。」
小童軍表演慾旺盛
揚揚在4歲那年便加入童軍行列，因為阿呂與太太楊小娟覺得兒子很有正義感，加上揚揚本身很喜歡紀律部隊，故阿呂就安排他參加一些跟紀律有關的課外活動，揚揚試過在課外活動時扮演警察，在學校也是一位班長，他總是喜歡管同學，小娟說：「個仔好有紀律，而且好有組織能力，佢試過喺學校做奧運會主持，中英對照都冇問題，其實佢好有表演慾，可能遺傳咗爸爸藝術細胞。」
小娟讚兒子的思維比一般小孩子快，因為他想像力豐富，而且他是個問題兒童，他實在太多問題發問，但發問的內容卻不像小朋友，小娟笑說：「佢同我講要發明一個機械人，要識做家務，可以幫輕我喎，用嚟服侍我，真係多謝佢。」
幽默感十足
小娟提到兒子時特別開心，她說：「有次我出外公幹唔喺香港，佢打電話畀我話：『媽咪，呢次大件事，冇你喺屋企，啲功課搞唔掂！』我真係畀佢笑死。」她覺得兒子的幽默感有時也大派用場，尤其當自己心情不好，只要見到這位小甜心，煩惱即盡消呢！
我是誰：夫妻恩愛 有影皆雙
現年51歲的呂良偉，99年邂逅貴州姑娘楊小娟，兩人迅速墮入愛河，拍拖兩年便踏入談婚論嫁階段，並於01年4月在法國巴黎LePreCatelan餐廳舉行盛大婚宴（圖右）。同年11月，楊小娟為夫誕下重7.5磅男嬰善揚，阿呂還帶備攝錄機拍攝生產過程。兩人婚姻生活美滿，又經常拍拖出席公開活動，十分恩愛。
