歐國盃貼波遊戲進入次階段，很不幸，多位吼葡萄牙封王的讀者宣告失利，今晚到大熱門荷蘭出場。荷蘭大戰俄羅斯，即尹巴士頓挑戰老師傅軒廸克，尹佬今季教波的水準有目共睹；而承接上一集，有讀者繼續踩軒廸克，指他名大於實，甚至認為今晚將上演《無間道》，身在曹營心在漢的軒帥將義助祖國。
今集討論重點：
1.荷蘭有否冠軍相？
2.荷蘭人軒廸克帶領俄羅斯對荷蘭，能否以夷制夷？
3.意大利死裏逃生後，能否一口氣殺入決賽？
Alan：軒廸克實幫荷蘭！
我上集講過俄羅斯能夠殺入今屆歐國盃決賽周靠運，軒廸克咩「神奇教練」，根本就冇料到，我並唔會因為俄羅斯出線而改變呢個諗法。
講真，俄羅斯上場贏瑞典靠乜？只不過蝦人老，一味靠後生、快贏人。軒歷拿臣同埋伊巴謙莫域，一個老一個傷傷哋，俄羅斯贏根本唔代表軒廸克勁。荷蘭今次贏硬俄羅斯！
我再問你，如果你係軒廸克，你幫荷蘭定俄羅斯？佢係荷蘭人，梗係幫荷蘭啦。
Andy：尹佬勁過軒廸克！
尹巴士頓教波仲勁過軒廸克，佢教波好有心機。分組賽對法國場波，當荷蘭俾法國追近，尹巴士頓其實和波都得，但當時照換入前鋒進攻，為乜？擺明為淘汰賽做好準備，當正喺淘汰賽落後緊俾人咁去踢，試吓踢逆境波。睇唔到軒廸克嘅俄羅斯有咁嘅心思。荷蘭攻力又咁強，對俄羅斯應該贏得起。
金水：尹佬只忌往績
荷蘭處於強勢，而尹巴士頓唔會怕軒廸克，反而88年歐國盃，當時係球員嘅尹巴士頓，第1場就輸俾蘇聯，即係𠵱家嘅俄羅斯，所以今次對俄羅斯會有顧忌，唔會睇小呢隊波同埋唔會主動搶攻。今場我相信喺尹巴士頓悉心部署下，荷蘭都可以贏，但唔會贏得多，入球少。今場個細都仲有1.68倍，非常抵捧。
加料炮製
歐國盃期間，逢周一及周四都可以網上收睇《拉闊足球場》，本節目估波遊戲第2階段於17/06起接受登記。我們將提供$300供讀者從「冠軍」及「神射手」兩項中自由投注（最多兩注），參賽名額有限，先到先得，快啲登記啦！
《拉闊足球場》下次舉行日期：23/06
想參加？即上
http://soccer.atnextcom/jp/soccer
節目重溫：
http://sport.appledaily.com
