身邊朋友經常話筆者半夜三更睇鬼片，好大膽子！不過相較今日介紹嘅DVD——《霧地異煞》，日光日白講鬼古，級數絕不可同日而語；無計！StephenKing大師級作品，以詭異之濃霧深藏魑魅魍魎，人人自危困獸鬥，再加人性在歇斯底里情況下，恐慌蔓延、互相尋疑，形成一個外憂內亂的死局；有時恐怖片，唔使一味特技、擺明車馬嚇死你；其實人性中最猙獰的邪惡面，比鬼仲可怕。
記者、攝影：朱崇德
全鎮居民 超市困獸鬥
電影改編自StephenKing同名短篇小說（《TheMist》/1985年），再加《月黑高飛》及《綠里奇蹟》名大導法蘭達拉邦做生招牌，相信對真戲迷嚟講，呢$105冇可能唔畀！
話說美國內陸一小鎮剛受颶風所吹襲，全鎮上下居民正集中於當地唯一超級市場搶購物資，怎料忽被神秘白霧所籠罩；在伸手不見五指濃霧中，只薄薄一玻璃之隔，似乎隱藏着極盡兇殘之異煞；在這進退維谷之際，店內鎮民全進入歇斯底里、無政府狀態，以往的新仇舊恨，以及異端的宗教思想，變成一觸即發的爆發點，是被異煞生吞活剝、還是要人人相殺殆盡？悲劇的結局好像早已種下！
SilenceHill式壓抑玩代入感
電影上畫時最為人詬病者，是有如B級片的粗陋CG，令異煞的殺傷力大減；如果閣下是《星河戰隊》死硬Fans，《霧》片中你將好難找到樂趣！基本電影力Sell一種觸不到的殺機，雖則血肉大賤賣，但異煞妖物往往深躲霧中，極力營造出一種深沉的壓抑，令觀者有種親歷其境的代入感；至於聲畫表現方面，除咗真正埋牙嗰三幾幕外，基本係電玩《SilenceHill》再加文場戲的混合體，雖則有dts-ES5.1，但整體表現只屬一般；但最離譜係連Making都慳埋，只單上預告片當Bonus，感覺有啲失望。
Profile
戲名：霧地異煞
售價：$105
發行：泛亞
片長：125分鐘
字幕：中文(繁、簡體)/英文
音效：dts-ES5.1、DolbyDigital5.1EX