近年車壇越嚟越興踩過界，七人車扮細車；細車又學番跑車。家陣連四門房車Mazda6都不甘寂寞，將尾箱格局變成揭背，硬生生提升容量空間，打通後排變成床，真係揮低唔少七人車！
記者：徐影龍
攝影：王文忠
Model：Pinky@StageModels
尾股走勢凌厲
正所謂有人辭官歸故里，有人漏夜趕科場，嗰邊廂寶馬135i才剛將傳統玩揭背嘅1系改番做有尾車，呢邊Mazda玩番轉頭，本係四門房車格嘅6系，車尾竟變成好似開罐頭沙甸魚咁，一大塊尾冚從後揭起，目的就係打通埋後排，隨時變出極度闊落嘅空間。由於摺低後排座椅能跟尾廂完全銜接，又平坦又大嘅尾廂，靈活實用性大大提升，就算擺張IKEA雙座位梳化入去都仲得，分分鐘搬屋連Call車都慳番！我哋就鋪晒床單、毛氈同枕頭，叫Model走上去扮瞓覺，見佢興奮咁典嚟典去，話仲大過屋企張床，夠晒誇張。
Mazda近年大玩ZoomZoom概念後，幾個車系嘅線條都設計得好靚，尤其加入菱形落頭尾燈，與時並進唔會老套。難得加入大尾廂後仍然靚仔，不失四門房車格局之餘，車尾變成斜背更添跑味，而且新版更加入浮動式定風翼，整個車尾線條相當吸引，可算平衡到房車有大櫳嘅雙贏優勢。
舊Vs新
大堆頭裝備引你買
個人頗欣賞Mazda幾個車系都以裝備豐富聞名，好多車行為求做到靚價，通常會閹割唔少配備，但今日呢架Mazda62.5S，就以抵玩兼齊料做賣點。S版本身含有Stylish、Sporty同Smart三大意思，單睇車身，火紅VelocityRed為S版獨有，而輪拱稍稍凸出及貼近輪胎，令6系望落更似架單門轎跑。試埋內櫳，三幅式真皮軚環連軚波、真皮仿桶椅、8個BOSE喇叭、電動天窗、免匙系統以及我最喜愛嘅戰機式錶板等，諗到嘅差不多全部落齊，連埋套18"合金軨同包圍，170匹扮埋小跑車，叫價25萬幾，近乎拍住韓國車嘅低價位。
能房能跑可算雙面刃，正面啲睇係用途廣泛，飆車掟彎、坐人裝貨乜都得。但真係要彈嘅話，當佢轎跑我會嫌5前速+/-唔夠玩，當佢房車我又嫌避震偏硬，老竇老母坐長途實詐型，雖難以盡得天下人心，但對一眾科水買車嘅男人嚟講，房跑合一有賣相兼有咁大個尾廂，毋須再花錢加加減減，唔使篤計數機都知廿零萬諗得過。
規格表
引擎：2,488c.c.直四DOHC
馬力：170hp/6,000rpm
扭力：23.0kgm/4,000rpm
傳動：5前速+/-連軚波
查詢：MazdaHK（28931112）
