殼股有價，呢期熱炒，而四叔系內恒發（097），「可塑性」唔細。寰宇（1046）對上星期五，公佈話可能賣盤，單日升咗近40%。又4月份時，佳訊（030）賣盤，雖則，呢期港股風雨飄搖，但佳訊股價，到家陣仍翻近一番，殼股成為個別熱炒對象。
睇番恒發，集團自從出售咗煤氣（003）權益之後，除咗幾條公路項目，家陣已經冇乜重要業務。再加埋恒發份屬四叔系，有超級大孖沙雄厚背景，而大股東又揸咗近68%權益，權益集中，齋睇牌頭，恒發可塑性好高。
又計埋集團今年頭再派現金股息1.21元，恒發手頭現金應該仲有9億銀，每股現金值近0.3元，係現價（0.75元）40%。有新業務發展之前，恒發銀彈充裕，有一定防風力。先嚟轉短打，以4月橫行頂0.94元做目標，現價潛在回報率25%。
四通博靚業績
四通（409）上年9月底仲揸住花旗國上市嘅新浪（Sina）250萬股。後邊Sina，由今年3月中低位32蚊美金，彈升咗幾乎50%。以250萬股做參考，計計數，四通呢段期間，受惠Sina升幅，家底亦同告升值3億港銀，相等於四通每股0.15元。但3月中以嚟，四通升咗兩個仙咁大把。
再講，四通旗下主打保健品「腦白金」，再獲07年內地保健品市場銷售冠軍，四通嚟緊業績，亦應該好省鏡。呢轉博四通足額反映Sina所帶嚟升值，要見0.71元，現價（0.56元）潛在升幅27%。