馬季快將完結，今日就係一年一度嘅「香港賽馬會社群日」，馬會招待各社會志願團體─特別係馬會資助嘅NGO，到馬會廂房午宴。想話見到大量NGO嘅董事、理事、總幹事，今日就係最好時間。
老友Ｌ太曾經做過一個NGO嘅理事，自己不時陪老公到馬場（佢冇腳打高爾夫嗰陣），今日唔知會唔會到馬場一行。前幾日Ｌ太請吃午飯，席間佢透露在沙田火炭御龍山買咗一個第八座大單位。咦，即刻問佢：「你住慣麥當奴道嘅噃，做乜要買御龍山？貪近馬場呀？」Ｌ太話：「唔係，不過御龍山所在地就係何東樓，我嘅鄉下就係何東樓附近一條村，對嗰度有回憶有感情啫。」原來如此，好多年以前，沙田馬場本是沙田海，岸邊就係大埔道，住在何東樓附近之村民，落海扒艇好容易。
Ｌ太老公與一班老友係馬場常客，多年來養馬不少，今年又以團體名義中籤，多數會買隻新馬放在告東尼馬房。Ｌ太話告仔做騎師嗰陣已經相識，平日私交甚篤。Ｌ太話做騎師確實唔容易㗎，須不斷下苦工，譬如二十幾年前嘅最有前途見習生譚文就（現於澳門做練馬師）就經常在屋企罰自己企，郁都唔郁，罰企姿態係雙腿夾住本電話簿，電話簿不能鬆脫，跌在地上。事隔多年，Ｌ太與告東尼等人有晚聚埋一齊，告仔叫一位身重二百幾磅嘅肥仔朋友Ｃ：「嗱，肥仔，我紮好馬步，你試吓推我。」肥仔Ｃ比告仔高兩個頭，向告仔大力一推，竟然推唔郁，告仔笑騎騎咁話：「你估做騎師好易呀。」
要做好騎師，不下苦功，轉行可也。一位加拿大女騎師韋羨妮今年曾來港客串，一位馬會董事在沙圈與她握手，韋羨妮好熱情，緊緊一握，董事幾乎笑唔出，事後同左丁山講：「哎吔，我隻手好痛，乜呢位女士啲手力咁厲害！」唔好睇小呢位騎師身材嘅女士，手冇力，怎可以緊握韁繩？
騎師生涯不易，好似高雅志咁，近五十歲仍然經常贏馬，可見此君十分自律，生活嚴肅，苦練不懈。評馬人Ｙ曾到屯門騎術學校試騎電動木馬，試咗兩招常見嘅騎師姿態，即刻嗌一聲：「抽筋嘞」，唯有落馬，唔敢再試，佢叫左丁山上馬一試，自己當然耍手擰頭，我哋係舞得郁枝筆嘅啫！