好熱，出街行兩轉已經出晒汗，好似入微波爐叮亁咗咁。忽然醒起老媽子，每逢天時暑熱總會煲定冬瓜水畀我嘆，細個唔識貨，仲嫌無味唔肯飲，家陣先知冬瓜係好嘢，外賣打包返屋企，透心凉呀。
記者：王震遠
攝影：王文忠
模特兒：Carin@StageModels
鳴謝：東方紅
清熱健康類
新出自家湯
好多港鐵站都有「鴻福堂」分店，糖水凉茶賣到街知巷聞，最新自家湯系列都好多人Buy。除肉體健康，「鴻福堂」仲注意埋客人心靈健康，分店賣埋宗教、食譜等安撫心靈書籍，客人可以免費揭閱。（北角英皇道238號康澤花園地下A1舖/25666002）
清凉冬瓜茶$18
略甜，成份有冬瓜、薏米同燈心草，有助去濕消暑，真係解到渴，好過飲汽水多多聲。
冬瓜薏米鮮蓮子米鴨湯$40
自家湯系列之一，即剪即飲，返屋企叮熱飲搞掂，入喉嚨感覺好滋潤，正在又唔會太鹹，有老火湯Feel。
食客有Say
阿帆
「個湯幾香，幾清，一啲都唔油膩，肉都好夠味。」
樽裝方便攜帶
「健康工房」裝修幾掂，既有舊式凉茶舖味道，裝修形象又幾新潮，專賣滋補湯同健康茶等養生食品，港鐵站有分店，返工放工飲番碗，好方便。（太古城元宮閣G404號舖/25601288）
鮮荷葉冬瓜薏米山斑魚湯$32/10oz$40/14oz
好怕魚湯無魚味，呢碗湯魚味就夠晒濃嘞！荷葉味、冬瓜味同薏米味啖啖分得出，好掂呀。
香荷冬瓜薏米露$15/支$10/杯
色澤通透，入口即時Feel到冬瓜清新香味，薏米入口糊糊哋，口感特別。
解暑甜品類
大大碗透心凉
「老友記」果然夠老友，份量十足大大碗，甜品真材實料，齋做外賣都做到手軟，口碑好掂。（旺角山東街48號泰豐大廈地下E舖/27802083）
冬南匯聚$18
冬瓜同南瓜加冰糖煮成茸鋪底，上鋪燉熟咗嘅南瓜粒同玻璃脆珠，就完成冬南匯聚，甜而不漏。
心曠神怡$23
落冰糖燉熟冬瓜，再打成茸加士多啤梨，入口清甜美味，夏天飲番杯，凉到入心。
食客有Say
Vicky
「冬南匯聚唔算好甜，冬瓜呢種新口味，幾得意喎。」
Venus
「心曠神怡好香草莓味，加冬瓜無咁酸。」
創意新甜品
「溏苑」係區內數一數二甜品店，裝修企理光線柔和，坐得幾舒服。老闆Jacky自創好多新式甜品，第二間舖食唔到㗎，單係呢份新精神都值得捧場啦。（旺角廣華街3號百利達廣場地下1號舖/21714913）
冬瓜茸拌豆腐花$18
豆腐花面鋪上一層冬瓜茸，多一份口感，冬瓜茸無蓋過豆腐花清香。
清熱三寶$20
三寶即冬瓜、青瓜同苦瓜汁，味道怪？唔覺喎，飲完喉嚨好舒服。
冬瓜南瓜椰汁露$22
南瓜甜味同清香冬瓜粒好Match，加椰汁，椰香刺激味蕾，更加無得頂。
食客有Say
Carin
「椰汁露好正，夾冬瓜同南瓜，第二度未試過。」
止口痕類
巡場搵嘢𡁻
知你口痕，唔搵啲嘢𡁻吓唔安樂，去「台灣美食廣場」掟個Round啦，大把冬瓜凍飲、糖果選擇，有心揀，總有一款啱你心水。（北角新都城地庫）
綠得黑糖冬瓜糖$6.9
味道好濃，入口以為自己食緊某牌子潤喉糖，食落幾甜，唔會遮蓋晒冬瓜味。
濃情蜜意冬瓜茶$6.5
甜味啱啱好，唔會蓋過冬瓜味，勁清凉，唔會飲到成口黐𣲷𣲷。
名屋冬瓜露$5
清新飲品，雪凍飲透心凉，好過飲啲乜冰物冰多多聲啦。
