「咪做儍事喇，蠢豬！」如果係爸爸媽媽講呢句話，你未必聽得入腦，換轉係國家總理情況又會否一樣呢？德國國腳舒韋恩史廸加，就曾因之前與祖國女總理齊齊睇波被點醒，瞬即喺8強戰回勇，貢獻一記入球及兩個助攻；長輩講嘢，後輩千祈咪當耳邊風！
女總理點醒即發威
因為個姓Schweinsteiger喺德文解作豬欄而獲得「小豬」呢個綽號嘅舒韋恩史廸加，上演了一幕真人版嘅「豬法奇緣」，事緣係咁：「小豬」喺分組賽對克羅地亞時鹵莽犯規，遭球證出示紅牌驅逐，因而有機會與德國女總理默克爾，安坐喺觀眾席睇波，而後者當時就語重心長對「小豬」講：「蠢豬，以後咪再做儍事喇，你應該發揮出自己應有水準，就好似06世盃時一樣！」
此話何解？原來默克爾乃國內著名球癡，佢記得06世盃季軍戰德國對葡萄牙時，「小豬」梅開二度，助球隊奪得季軍而回，故此就特別提醒該8月才年滿24歲嘅新人，勿再重複犯錯；果然，一言驚醒夢中人，「小豬」不單止個人先開紀錄，更妙傳畀前鋒高路斯、中場波歷克建功，贏盡掌聲，更順利當選賽後最佳球員，實至名歸。
「小豬」賽後雖然立即衝前親吻女友莎拉，盡展兩人情濃化不開（當然冇可能錫總理啦），惟總理一言，勝過千金，「小豬」笑言：「總理講嘅嘢，我冇得唔聽！」同時，「小豬」亦希望在準決賽再撼克羅地亞報仇：「冇錯，我想再同克軍鬥多次！」見報之時，該場4強應有戰果，且看「小豬」能否夢想成真，繼續其「豬法奇緣」之旅？