幾位老友睇咗星期三本欄講「荷蘭可以奪標」，分別來電話：「荷蘭無疑係好波，但唔識奪標戰略，今日凌晨場波，輸咗畀羅馬尼亞咪算囉；𠵱家放生咗意大利，埋下後患，四強準決賽再遇意隊，荷蘭輸波都似！」荷蘭應該輸波，一併解決意大利、法國兩隊之言，老早傳到滿天飛。荷蘭對羅馬尼亞，竟然有二點七至三倍（主勝），左丁山幾乎想瞓身。但自己畢竟係亞洲人，受太多「陰謀論」教訓，唔知荷蘭係唔係真的縮骨，諗咗一輪，唔敢下注。踢完嘞，荷蘭以副選上陣，仍然贏二比○，不禁呻笨，自己仍有小人之心。
亞洲人打波，零舍鍾意走精邊，故意輸波出線之例子，層出不窮，拉丁球隊亦係一樣，葡萄牙、西班牙、意大利國家隊皆有此傾向，德國隊精於計謀，久唔久為咗戰略需要，同樣出呢招。憑過往經驗所知，水波英格蘭與好波荷蘭最有體育精神，贏得就贏，唔理會走線呢回事，賭波下注呢兩隊唔使驚有蠱惑嘢。
以上老友所講之戰略，連BBC足球評論員PhilMcNulty都贊同。Phil話意大利係慢熱隊伍，會越打越好（如二○○六年世界盃），雲巴士頓唔故意輸波，恐成後患，意大利既然出到線，隨時會撼低西班牙與荷蘭，進入決賽，Phil一言既出，立即畀英國足球迷上網留言圍攻，話佢冇體育精神，亦睇小副選球員上陣求勝，爭取表現嘅決心，而且佢哋亦唔會特登踢到懶洋洋，侮辱咗國家隊嘅球衣。
雲巴士頓係值得尊敬嘅，為體育精神，犧牲戰略，佢自己曾係國家隊主將，點會叫現今球員放水咁羞家吖，你估係南韓羽毛球隊咩。好嘞，荷蘭聽朝（六月二十二日凌晨二點四十五分）對俄羅斯踢半準決賽，應該贏波啦，俄國唔夠砌嘅。六月二十三日（唉吔係星期一凌晨，睇完波點返工？）西班牙對意大利，你估進攻型球隊取勝吖，還是老狐狸意大利嘅突擊贏波呢？為咗足球嘅可觀性，左丁山希望西班牙贏。如果今屆歐洲盃決賽係由意大利對德國嘅話，悶鬥悶，不如熄電視瞓覺好過。