自SteveJobs上星期喺AppleWWDC公佈推出iPhone3G，仲要平到US$199/8GB、US$299/16GB，舊版iPhone即引發恐慌性拋售，人人諗住扲定$1,500買番部！不過大家可能冇留意到買機係要連台Plan，最新水貨佬估計8GB、16GB版喺貨源充足情況下，都要分別以$7,600、$8,600劏返嚟！一個唔好彩貨量少，機價隨時炒貴$1,000-$3,000！呢排香港日日落雨，但個天係唔會跌部iPhone3G落嚟㗎！
記者：朱崇德、陳國輝
攝影：林栢鈞、陳盛臣
iPhone3G迷照Buy！
阿雄：呢啲係出嚟Walk嘅行頭嘢！貴啲都要玩第一「浸」！
Irene：咁貴呀？咁我唔買喇！我啱啱先幫部2GiPhone貼咗個碳纖背，我又唔玩3G，覺得新不如舊！
Tim：唔係$1,500咩？底價都要七八千，炒到咁離譜？
阿紅：自己就唔會買，但國內好多朋友都託我幫佢哋昅實個價幫手入貨。
Maggie：我今日行先達都係想問iPhone3G個價，六七千我會買，不過一定要白機版。
小李：我都知冇可能咁平！2G版都要四五千啦，新機平過舊機，一早就知佢Steve玩「老噱」啦！
Yimmy：好貴呀！仲隨時過萬？不過都係好想買，因為真係好型！
陳生：OK呀個價！我就係驚平得滯、人手一部；少啲人買得起，玩頭「浸」先威嘛！
Betty：我暫時都係覺得部舊iPhone仲OK！唔係價錢問題，係我對3G服務冇興趣。
外國公佈：0機價＋過千月費
$400-$500月費計劃？聽落好似好嚇人，不過現知英、美、德三地公佈iPhone3G買機連Plan出，大約都係呢個價位！而且普遍趨勢係通話及數據月費以Package推出。另外仲發現外國有香港早年0機價一類噱頭嘢，不過月費動輒飆上近$1,000，真係玩得幾富貴。
水貨專業估價
機價隨時過萬
以出機總價計算，水貨劏機以O2/30英鎊Plan最抵玩！不過論貨量，由上代iPhone傳統嚟講，仍以美國本土AT&T機最多、貨源最穩定。當$1,500機價完全無賺，劏卡包底「24期月費」負責四、五成，8GB水貨嚟到香港開價隨時都要$7,600、16GB版大約$8,600；加上喺頭水人人搶情況下，$1,000-$3,000炒賣「附加費」都隨時發生，所以亦有機會似舊iPhone剛剛到港一樣迫上過萬蚊！
主劏英國0機價
正路出水貨，AT&T同O2嘅平Plan係不二之選，不過喺網上已經盛傳，有邪道劏機客，已着眼吼實英、德兩地網絡嘅0機價同1歐羅機價！傳統蠱惑招數係以空殼公司以呢類平Plan大量出機（例如以公司職員每人出一部機為名義），然後再玩清盤走台費；不過經上代iPhone劏卡蠱惑招教訓，據知今次iPhone3G出機，大部份網絡商都要求以信用卡交台費，希望可堵塞呢方面漏洞。
全民皆估：3出乜Plan？
3仔攞到iPhone3G首賣係人都知！不過更多人討論嘅係出機配乜Plan？3仔表示暫時未有機價或月費計劃透露，不過坊間盛傳機價8GB/$1,580，16GB/$2,380口徑一致，但月費方面就相當飄忽！
傳聞一：$4,684埋單
先達有Sales話自己老死係「3仔人」，$128通話月費、機價全數預繳、簽18個月約就收工！如果此話當真，總成本價$3,884、$4,684就買斷8GB同16GB版，相信香港將成為全球首屈一指嘅「水貨」iPhone3G劏機中心！
傳聞二：無限上網月費
亦有人話數據月費應為$300-$400之間，其他條款不變，再加送無限上網！但據知現時3仔流動數據無限上網計劃月費都要$488，如果真係咁賣大包，相信唔止二手煙，食叉燒包都鯁得死人！
傳聞三：CSL都有得賣？
另一網上傳聞，係估計其他幾間3G台都可能有「機」！理據係3仔冇曬自己係「獨家」，加上連和記電訊行政總裁呂博聞喺新聞稿都只說：「……，成為首家於大中華區推出iPhone3G的網絡商。」正所謂有「首家」，會唔會仲有第二、三、四家？更有傳聞直指CSL將成為第二家推出iPhone3G的網絡商，如果係真，恭喜晒，香港市民又多個選擇！
iPhone3G未出 SIMLock已破解？
另一大行內傳聞，係iPhone3G嘅SIMLock喺SteveJobsKeynotes之前已經遭到破解！
據億訊電話維修負責人Wilson表示，基本iPhone3G未曝光之前，網上已經流傳「指名道姓」嘅解Lock軟件。據知同解上代2G版iPhone一樣使用《HyperSIM》做「軟解」，完全唔使拆機改，「不過係咪真係Work？當然要等真正出咗機、試過先敢講啦！究竟係完全破解，定係好似日本手機咁局部破解，只可打出、打入，係好多人昅實嘅焦點！」
估計改機費用會在$300-$400左右，不過改機後會喪失原廠保養，呢啲都係玩「邪道」嘅後遺症！相信7月11日iPhone3G到貨後4至7日內會有破解軟件推出市面，而喺呢幾個禮拜「空窗期」，機價會比較務實低迷，係入貨最好價錢。破解後先入貨，一定俾人炒到暈，博唔博就自己諗喇！
