釣魚台博士馬英九（按：馬博士之哈佛博士論文以釣魚台主權為主題）就任總統未夠一個月，就要應付釣魚台「危機」，不知是巧合還是民進黨要整蠱佢。六月十六日，台灣艦艇與日本戰艦在釣魚台海域對峙，卒之有緊張，冇出事，馬英九可以過關。目前北京與東京關係，北京與台北關係，進入冰河解凍時期，逐步和暖，東京一向視台北為自己人，料不到一隻台灣漁船駛入釣魚台海域，就立即觸動台北與東京之神經，所以國際政治這回事，有好多不可預測嘅地方。胡錦濤下個月去日本出席G8首腦會議，九月到日本出席中日韓三國高峯會，你話如果台灣與日本真的擦槍走火，北京會幾咁尷尬呢。
星期一上午打個電話去東京問肥仔Ｋ關於日本方面如何反應，肥仔Ｋ正與同學睇緊NBA決賽第五場，進入第四節決定勝負時刻，肥仔Ｋ大聲講：「Celtics追緊上嚟，Lakers唔知會唔會再次wetthebed，唔好講住！」打完嘞，Celtics卒之追唔到，LA贏103比98，全靠加納特射失罰球，於是總場數係三比二，波士頓領先一場。今日本文見報之時，邊隊攞冠軍已經知道咗咯。肥仔Ｋ睇完波後回電講釣魚台，佢話：「東京報紙幾乎隻字不提，日本人民冇留意呢件事。學校嘅台灣同學冇乜反應，睇NBA仲緊張多啲。台灣駐日代表許世楷有日本居留權，鍾意日本多過鍾意『中華民國』，係台獨一派，馬英九唔因呢次事件炒佢，佢都會辭職。」
呢類事件（即政治人物持外國護照或居留權）大概只會在香港與台灣發生。記得好多年前，一位校友因移民加拿大多年，老早入咗加籍，在渥大華加國「中央政府」打工，官階升到與駐外總領事相同。呢位校友申請調回香港做幾年，加國政府唔批，理由不言而喻。校友於是知道加國政府有顧忌，雖則佢已宣誓效忠加拿大。後來佢辭去官職，返香港為私人企業打工，搵多幾倍人工，搵夠咗先至回加拿大退休嘆世界。港台居民拿外國居留權嘅比例特別高，無可厚非，但如果要加入本地政壇，就冇謂又食又拎嘞。