歐國盃D組周三結束，希臘同瑞典雙雙無得留低，同係36歲嘅耆英軒歷拿臣與尼高普尼廸斯命運各異，前者出局仍受讚譽，仲有心有力表明會踢埋2010南非世盃；而後者告別國際賽，可謂同人不同命！
瑞典出局，求大俠以為從此與前度歐洲金靴獎得主軒歷拿臣緣慳一面，事關佢現效希爾星堡，平日睇佢表現機會唔多，點知佢賽後語出驚人表示：「我之前講過，只要教練一日覺得我仲有價值，我就願意繼續為國賣命，而2010年南非世界盃更係所有足球員嘅美夢！」
言下之意，球迷可以放心，屆時將屆38歲嘅拿臣會與伊巴謙莫域續演雙箭頭。
今屆歐國盃第3度復出國際舞台嘅拿臣，雖則3場分組賽未有「士哥」，但演出有目共睹，除交出美妙助攻畀伊巴怒射破網外，自己更踢咗274分鐘；只曾喺對西班牙時完場前被換走，更從未「賣老抽」，絕對係職業球員典範。更值得拿臣高興的是，世盃外最強嘅對手只有葡萄牙、丹麥，剩餘嘅馬耳他、阿爾巴尼亞等應屬陪跑馬，瑞典出線形勢樂觀。
「佐治古尼」無復當年勇
另一邊廂，貌似型佬佐治古尼嘅希臘守護神尼高普尼廸斯，去屆保持了跨屆425分鐘歐國盃不失紀錄，可惜4載一別，「佐治古尼」無復當年勇！
尼高普尼廸斯上屆眼神果敢堅定，進入淘汰賽後從未失球，希臘奪標佢係關鍵功臣；豈料今屆眼神呆滯，不單止隊長臂章俾巴斯拿斯搶去，而分組賽3場被5度破關，其中兩球更責無旁貸；無怪乎要喺決賽周後闊別國際賽，只可惜這句號並不完美。