Beyond三子中黃家強最先成家立室，葉世榮早前也透露明年會迎娶拍拖兩年的女友Faye，未知黃貫中（Paul）是否受兩位好兄弟影響，日前接受有線訪問時，直言必定迎娶女友朱茵，又謂擔心朱茵拍戲穿慣婚紗，會失去喜悅的感覺。
黃貫中與朱茵已拍拖九年，感情一向穩定，但遲遲未肯步入教堂，日前阿Paul接受訪問時，談及其愛情長跑態度堅定，明顯非朱茵不娶，他說：「我絕對會娶佢，不過大家都好忙，冇時間，忙唔係藉口，而係事實。」
「冇諗過生小朋友」
至於生兒育女的問題，阿Paul說：「其實大家都冇諗過要生小朋友，所以都唔需要太趕急。」最後他又強調只要稍後有時間便會結婚。
昨日阿Paul到台灣出席中華音樂人交流協會舉辦的頒獎禮，其首張國語大碟《我在存在》獲頒十大專輯獎，接受記者訪問時，阿Paul再次表示十分重視而且一定會跟朱茵結婚，但不會鋪張，他說：「唔好諗結咗婚就搞掂咗，搞得唔好可能係噩夢嘅開始，因為你會忽然多咗好多親戚，好多嘢都會唔同咗。」
至於得獎一事，阿Paul坦言感意外，更表示女友對他奪獎的第一個反應也是說：「你攞獎？你好耐冇攞獎囉喎！」阿Paul指《我》碟是他唯一一張國語碟，能夠奪獎一定要慶祝一番。
阿Paul說：「知道有獎時好愕然，心諗有冇搞錯，我冇去台灣又冇宣傳過，自己都心中有愧，唔知使唔使搵嘢換。」其後得知獎項由有份量的音樂人選出，香港歌手中更只得他與方大同奪獎，他坦言感到非常榮幸，令他更有動力做好音樂，他又說：「拎呢個獎仲開心過中六合彩。」
撰文：林妃