王菲復出嘅傳聞一直未停過，噚日內地又有報道話王菲喺明年鐵定復出，第一步嘅工作係先做巡迴演唱會，繼而再出唱片，𠵱家已經有唔少娛樂商想幫佢開演唱會，但阿菲仲未落實同邊間公司合作，不過由洪廸主理嘅LiveNation同王菲合作嘅機會應該較高，因為佢哋喺EMI年代已經合作過。
為嫣然基金籌經費
噚日馮仁昭打畀王菲經理人陳家瑛求證，佢話：「其實有關佢復出嘅事，𠵱家仲未知，因為我都要喺日內飛去北京一次，同佢確實傾清楚之後先至可以有公佈！所以呢一刻我都唔可以肯定畀到一個答案大家。」
自從嫁咗李亞鵬後，王菲原本都好專心相夫教子，但人始終會靜極思動，想搵啲嘢搞吓！不過王菲復出做嘢，都唔係純為自己搵錢，因為佢搞嗰個嫣然基金，主力係幫內地嘅小朋友，咁佢自己都想可以賺多啲錢，為個基金搵多啲經費。
此外，噚日有內地互聯網登咗一張戴了口罩嘅女子嘅相，報道話王菲一個人走到北京三里屯酒吧消遣，但佢身邊竟然一個朋友都冇。
