陳慧琳（Kelly）前晚在演唱會宣佈結婚，雖然她不會淡出娛樂圈，因為她對演藝工作依然熱愛，但婚後工作量肯定會減少。不過她會嘗試當老闆，遇到合適的電影，她會參與投資拍片，不會再像以前純粹做幕前工作。
陳慧琳由94年開始在娛樂圈發展，一直只參與幕前演出，從來未試過自己做老闆，但自從去年投資過電影《江山美人》後，終於嘗過老闆癮，有傳言她會與經理人鍾珍合作開經理人公司和投資拍戲，一於致力栽培下一代接班人，以及開拍一些自己喜歡的電影作品，而幕前演出就會相對減少。
其實Kelly與男友一早有結婚打算，所以去年開始，她已經為婚後事業鋪路，由於她婚後會生孩子組織一個溫暖家庭，所以幕前演出勢必會減少，但她不會完全放棄娛樂事業，所以她想嘗試做幕後工作。
投資《江》片試金石
去年Kelly投資《江》片就是試金石，雖然影片沒有錢賺，但她拍攝這部戲，可以參與很多意見，實在給她很大滿足感，所以投資這戲沒有錢賺也不打緊，Kelly仍然有意思再投資下一部電影。
原本Kelly計劃在結婚前再拍一部戲，但現時因為劇本未如理想，她與鍾珍都不想勉強開戲，寧願搞好劇本才開拍，所以投資下部戲的計劃，可能要等到結婚後才可以進行。記者昨日致電向鍾珍求證，她表示：「其實Kelly唔係咁識做生意，所以我唔會同佢搞經理人公司，不過投資拍戲算有嘅，因為拍《江山美人》時，佢係減收咗片酬，當投資呢部戲，不過大股東係美亞同中國保利，我同佢就唔係投資好多啫！」
鍾珍：幫佢張羅婚禮
鍾珍續說：「下一部戲Kelly都想做完演唱會後就開拍，但因為劇本未掂，所以又要延遲。其實佢喺結婚前，工作排得密麻麻，佢真係冇乜時間去籌備婚禮，𠵱家都係我幫佢張羅。」
至於Kelly前晚的尾場個唱，大抵因她公佈婚訊心情緊張，兩度蝦碌記錯演出部份，她以睡公主造型落台後，嘉賓黎明上台獻唱，笑言要𠱁睡公主起身，故他對着Kelly消失的機關位置唱兒歌：「小寶寶，未食蛋糕，快啲起身。」
黎明：誠心祝福佢哋
但黎明對自己的演出都忍俊不禁，不斷儍笑，最後他與Kelly牽手圍繞台邊唱快歌，黎明更破例大跳勁舞，非常投入。對於Kelly結婚，他說：「我都係返到後台先知，真係為佢哋開心，誠心祝福佢哋。」
採訪：葉雪、馬建華
攝影：仇志德
全城熱話：「睇騷睇到喊」
Kelly前晚宣佈結婚，圈中眾藝人均戥她開心，有份睇騷的周麗淇更表示被她感動落淚。
周麗淇：好感動
我噚晚都喺現場，我都感動落淚，Kelly問大家仲會唔會支持佢時，我見到鍾珍同工作人員都喊，我又忍唔住，真係開心嘅喜悅，我都未試過喺紅館睇騷睇到喊，我都希望有呢一日。
雷頌德：快啲生
女人最開心就係嫁人，佢婚後唔會退出，因為佢會身痕，佢今次演唱會咁努力，係想留下美好回憶，佢𠵱家結婚係好正確做法，最好快啲生BB。
鄧麗欣：我都恨
我好戥Kelly開心，我自己都恨有呢一日，所以我都要努力搵個好對象。Kelly同男友拍咗十幾年拖，真係有情人終成眷屬。我都好想有一日喺紅館開騷宣佈婚訊，因為我一直都好想有小朋友。
鄭嘉穎：恭喜佢
我識Kelly，但係唔熟，佢結婚係好事，係喜事，恭喜佢。之前傳過佢同男友結婚，不過得個傳字，不過𠵱家佢親口承認，我都戥佢開心，好事嚟吖！
陳美詩：好恩愛
替佢開心，佢同佢男朋友都一齊咁耐，都差唔多，平時都咁恩愛，就算生唔生都要結婚，好似蔡少芬咁，結咗婚唔使再收埋，可以拖住手咁出街。
奚仲文：祝福佢
我都有感動，祝福佢哋開心，佢係好難得嘅成功女性，Kelly踏上人生另一階段。
好友Celia：做伴娘
我同Kelly係中二同學，我喺後台感動到喊，因為見證佢哋拍拖十幾年，如果佢搵我做伴娘一定會做。
人物誌：世界傑青歌影出色
94年：參與拍攝張學友的音樂特輯《偷心》而入行。
95年：與郭富城合演《仙樂飄飄》〈圖〉，憑主題曲《一切很美只因有你》唱至街知巷聞，橫掃各大樂壇頒獎禮最佳新人獎，旋即躋身為天后歌手之列。
01年：連續6年奪得《十大勁歌金曲頒獎典禮》亞太區最受歡迎香港女歌星獎，天后地位毋庸置疑。
02年：獲選香港十大傑出青年。
04年：獲選為世界傑出青年〈圖〉，也是首位得到此名銜的香港女藝人。
07年：Kelly近年轉攻內地市場，在港的聲勢比全盛時期稍為遜色，競逐今屆《勁歌》亞太區最受歡迎香港女歌星獎敗給Twins。
資料來源：《蘋果》資料室
娛樂資料庫：天后出嫁難保事業
陳慧琳前晚揚言婚後會繼續工作，能否再攀事業高峯屬未知數，以下是幾位天后婚後的事業發展，相信可供Kelly參考。
王菲
96年嫁給竇唯後，人氣有增無減，更憑一曲《EyesOnMe》紅遍亞洲。05年與李亞鵬（右）再婚，逐漸淡出娛樂圈。近日王菲探訪四川災童（左），更有傳明年復出樂壇。
葉蒨文
96年與林子祥（左）結婚，婚後兩人減少工作，間中以「夫妻檔」登台搵銀，最近有指二人婚姻亮紅燈。
林憶蓮
98年在事業高峯期開記招宣佈與李宗盛結婚，事業開始走下坡，04年7月宣佈離婚。憶蓮近年積極工作，惜人氣已大不如前。
資料來源：《蘋果》資料室