玩具大王蔡志明的女兒蔡加敏，上月為東華前主席馬鴻銘誕下七磅三安士B女Chelsi。前晚馬家在旗下的灣仔佳寧娜擺滿月酒，蔡加敏謂現在每天餵七至八次人奶，一邊餵奶，一邊看着B女睡覺，深深體會母愛的偉大。
榮升父母的蔡加敏和馬鴻銘（John）前晚抱住小B女，一家三口以粉紅色親子裝出現，之前揚言不敢抱囡囡的John小心翼翼地抱着Chelsi上電梯，蔡加敏大讚老公是好爸爸，幫手餵奶換尿片，她說：「John好叻好有耐性，夜晚BB郁動，佢就好緊張起身。」
籲不要送玩具
初為人母的蔡加敏仍未習慣做媽咪，不過時刻都感到幸福溫馨，日餵人奶七八次的她說：「餵人奶時，一路搖住佢，睇住佢瞓着覺，覺得好偉大。BB食嘢好惡，肚餓時叫好大聲，又好好笑。」現場所見蔡加敏產後火速減磅，她笑說：「幻覺嚟咋，係瘦咗20磅，但仲要減20磅，我𠵱家食好少餐，一日三餐只係食營養嘢，戒咗朱古力同甜食，奶奶同陪月都有煲花膠同燕窩畀我。」
蔡加敏透露黎姿是BB契媽，更送了不少BB衫，本身是玩具大王千金的蔡加敏就呼籲大家不要再送玩具，她說：「玩具真係唔使再送咁多，屋企已經大把，玩唔晒。」蔡志明太太李惠莉就指蔡志明湊外孫多過當年湊仔女，她說：「嗰時佢唔湊，因為搏殺期，𠵱家就成日去睇BB。」
鼻形似足爸爸
馬蔡兩家人四代同堂在酒樓內慶祝，馬鴻銘和蔡加敏不時抱着B女四圍行，讓親友拍照，小Chelsi全程大覺瞓，但見她面仔圓圓，鼻形似足爸爸，相當可愛。
採訪：梁錦雯
攝影：陳順禎
