法國喺死亡C組包尾出局，當一眾球迷傷心欲絕之際，教練杜明尼治唔知係咪諗住攞番啲「渣拿」，賽後唔係即時認錯，竟然係同女友艾絲廸莉（Estelle）求婚！杜明尼治今屆喺歐國盃由排陣、換人都怪得驚人，估唔到出埋局都講啲咁嘢，唔通輸到short咗？
杜明尼治今次求婚嘅舉動，即時令我求大俠諗起《97古惑仔戰無不勝》嘅橋段。話說山雞（陳小春飾）要爭做屯門揸fit人，但「答問大會」前佢好驚選唔到，為免冇面，於是諗住攞番啲「渣拿」，就同女友淑芬（莫文蔚飾）講：「我選唔到你要嫁俾我！」
嘩！杜明尼治肯定係想跌落地「嗱」番「渣」沙，因為呢位教頭喺決賽周前已經收到唔少批評，先喺選人上唔揀查斯古特、麥薩斯同法米尼等人；戰術上又一定要打雙防中，搞到隊波冇晒創造力。
分組賽最後一輪對住意大利，杜明尼治雖然搵咗進攻中場拿斯利頂替受傷嘅列貝利，但當艾比度攞紅牌被逐兼輸緊1粒，杜帥換入中堅保桑可謂正路，不過寧願換走拿斯尼都唔抽走防中杜拿蘭或馬基列尼加強攻力，就整定最後追唔番啦。
今次歐國盃杜明尼治真係由頭怪到尾，3戰不勝出局都算啦，球迷諗住你會負番啲責任出嚟道個歉，班擁躉都受落啲吖。點知杜明尼治賽後接受法國電視台M6訪問時，竟然大大聲話：「𠵱家我咩都唔會諗㗎喇，我淨係諗住點樣返國同女友艾絲廸莉拉埋天窗，我會向佢求婚！」
冇咗個歐國盃、冇咗球員嘅信任、冇晒口碑、冇埋球迷嘅支持，杜明尼治直頭好少理，一於攞番啲「渣拿」，56歲搵定人生第二條後路好過咯！