「我要結婚啦！」樂壇天后陳慧琳（Kelly）前晚在紅館舉行尾場個唱，成為封館前最後一位表演歌星，其間她突然在台上宣佈婚訊，與拍拖16年的男友劉建浩（Alex）拉埋天窗。其後Kelly在慰勞宴上羞談男友求婚經過，指他手持6卡鑽戒跪在床邊向她求婚，場面浪漫感人。據知Kelly計劃10月結婚，婚後會盡快造人，她更公開發表愛的宣言說：「希望一生一世都愛大家，一齊到老。」
陳慧琳前晚踏上紅館台板舉行尾場演唱會，作為紅館裝修前最後一個演出歌星，臨近尾聲時，Kelly上演了令人感動的一幕，在逾萬觀眾面前激動落淚，高呼「我要結婚啦！」35歲的Kelly公佈與年輕她一歲的男友劉建浩結束16年愛情長跑，獲全場觀眾掌聲支持。在場的Kelly父親也拍掌打氣，且圍繞觀眾席慢步一周，感受觀眾送贈女兒的祝福及氣氛。
前晚Kelly雀躍得四度上台安哥，多次感謝fans支持及重複婚訊，喜形於色，她說：「今晚令我好回味，多謝晒。」又說：「我好唔捨得，你哋唔好唔記得我。」由於fans情緒高漲，凌晨12時仍未離場，Kelly最後一次上台獻唱後，笑稱已唱到很亁，臨走時她以不捨眼神游目紅館，終在約12時13分正式完場，但因超時被罰款五萬元。
回憶求婚
「感覺好似發夢咁」
其後大會假黃埔一酒店舉行慰勞宴，Kelly落車時有記者稱呼她劉太，她即時伸脷扮鬼面。宴上Kelly披露男友求婚經過，她說：「當日自己喺房度同男友傾電話，當時我以為佢唔喺香港，當自己行出房門時見佢企喺門口，好驚喜，感覺好似發夢咁，男朋友拖住我慢慢行去床邊，單腳跪喺地下，攞住隻戒指向我求婚，當時自己喊得好犀利。」她重提求婚情況也面紅紅兼眼濕濕，原來Alex在Kelly父親開設的珠寶店購買這枚六卡鑽戒，款式是經典六爪鑲鑽。
Kelly大方地說：「我鍾意呢個男仔咁多年，10幾年啦，由讀書到𠵱家，呢個男仔真係好好。」然後她又發表愛的宣言說：「希望一生一世都愛大家，希望我哋可以一齊到老。」
今年9月13日是Kelly的36歲生日，據知她原定在生日當天舉行婚禮，可惜因時間太緊迫，未能預定合適場地，要延期至10月舉行。Kelly也說：「原定9月，但太掹冇期，𠵱家仲度緊，會喺今年。」問她是否婚後不設防？她即說：「係呀！係呀！要造人。」Kelly表示目前身形很fit，可以趁機拍攝婚紗照，問Kelly會否送禮物給男友？她望着父親笑說：「有冇呢啲手續？成個人畀晒佢，大佬，仲想點？」但她強調不會退休。
外父滿意
「放心交個女畀佢」
陳爸爸則說嫁女心情複雜，笑言禮金交Kelly經理人鍾珍負責，問他是否已預備嫁妝？他笑道：「都幾攞膽，𠵱家啲鑽石都幾貴。我開心又唔捨得，開心個女嫁，同時又知道個女唔捨得呢份工。」被問到會否恨抱孫時，陳父即說：「恨呀！恨呀！越快越好。Alex滿分，我真係等咗好耐，不過我好放心交個女畀佢。」
Kelly經理人鍾珍謂陳媽媽前晚也在紅館，形容陳母開心到腳震，Kelly自爆婚訊前未有知會家人及男友，不過準新郎Alex則於昨日現身，於下午約6時離開位於荃灣的公司，駕車往女友的何文田寓所，滿面笑意的他入屋前笑道：「唔靚嘅相幫我delete呀。」至7時多，陳父、鍾珍和一班親友也先後到Kelly家共商婚事。據知Kelly本邀請著名美指奚仲文為她設計婚紗，但因時間趕急，製作需時，奚仲文改為飛往外國採購現成婚紗，但答允Kelly設計四至五款婚宴晚裝。
採訪：馬建華
攝影：仇志德、娛樂突發組
巨鑽求婚
有情歲月：零緋聞天后專情16年
即將結婚的樂壇天后陳慧琳，94年由紐約學成返港，參演張學友的音樂特輯《偷心》被羅致入樂壇，翌年與郭富城合演《仙樂飄飄》並主唱主題曲《一切很美只因有你》，同年9月與陳曉東、陳建穎及邱穎欣推出合唱大碟，隨即一炮而紅。Kelly雖身在娛圈多年，卻未有緋聞傳出，惟獨99年謝霆鋒被指暗戀她。
92年：Kelly在紐約一個朋友聚會上認識劉建浩（Alex），然後相戀，翌年甫出道已公開有男友。
98年11月：因Kelly工作與愛情不能兼顧，兩人聚少離多分手。
99年6月：有傳媒拍得Alex夜訪Kelly香閨，傳二人轉為地下情，但被Kelly斷然否認。
00年1月：Kelly接受電台訪問時指Alex已另結新歡，並為此感心酸，更沒進食數日，聲言暫時不會再見對方。
同年3月：傳Kelly與男友復合，當時她未有正面回應，卻直認Alex是唯一值得她考慮的男友人選。
03年10：再次傳出分手，原因是女方性格太強，男方又傳另結新歡，但被Kelly否認。
05年6月：有指Kelly迫婚成功，被拍得在灣仔買傢俬，其中包括一張雙人大床，盛傳與男友好事近。
06年12月：聖誕節期間，傳Kelly趁出埠登台，順道與男友在美國結婚，但Kelly否認。
08年4月：一度傳出Kelly事業心過重不肯結婚，結果跟男友分居兼鬧分手，但事後她強調二人感情穩定。
08年6月：Kelly在演唱會上宣佈婚訊。
資料來源：《蘋果》資料室
話你知：珠寶太子女配製衣少東
陳慧琳與未婚夫劉建浩均家世不俗，可說是門當戶對。Kelly父親陳崇偉從事珠寶生意，在中環太子大廈開設珠寶店「ChenBrothersArtsCompany」，家住東半山司徒拔道碧蕙園。Kelly母親曹子佳雖然於10多年前已與陳崇偉離婚，但兩母女關係良好。雖然Kelly家境富裕，但她從不靠父蔭，憑演藝事業賺取豐厚財產，05年更被揭租住4千多呎的加多利山豪宅，與Alex共賦同居。Alex父親劉基惠經營家族製衣生意，Alex於美國修讀建築畢業後回港打理生意，其後更自組絲花公司，身家同樣豐厚。
