組合農夫噚日去咗商台接受訪問，佢哋透露8月會舉行「農夫舉高隻手演唱會」，最近有同老闆陳冠希（Edison）緊密聯絡，陸永說：「因為我哋要同Edison傾8月個騷嘅細節，加上到時會有紀念品發售，Edison有份設計，前日已經收到佢設計嘅草圖，我哋兩個都好滿意。」農夫自己都設計咗兩隻名為「農貓」嘅熊貓公仔賣。C君又笑言屆時Edison可以喺場外做售貨員，不過之後佢又話：「我驚佢到時真係幫手賣嘅話，唔止記者唔入場，連啲觀眾都唔入場睇呀。」
農夫嘅新歌《舉高隻手》唱嘅部份比rap嘅多，所以佢哋花咗幾個月學唱歌，陸永說：「老師發現我一直唱歌用喉嚨發聲，係唱歌大忌，佢仲叫我做喉嚨王。」C君就話唔會為音樂會保養聲帶。
陳見飛不捨男友
另外，陳冠希家姐陳見飛同男友Felix，噚日出席觀塘apm奧運珍藏品展覽，佢同男友深情擁抱兼不時互望，好似好唔捨得咁款。陳見飛話：「我聽日就走喇，所以心情好怪，因為返去就離開男友，但係又可以見到細佬。我喺嗰邊搵咗份PR工，佢9月會嚟探我。」同場嘅韓君婷就笑住話：「見到佢哋我心酸晒，𠵱家願望係拍拖結婚生仔同多啲嘢做。」
