又到7.1，今年係奧運年，民陣早前訂出今年遊行主題係「同一夢想、同一人權；還政於民、改善民生」，不過政治一日都太長，爆出副局長、政治助理國籍、薪酬風波後，民主派即時加料，為遊行加入新抗議元素，最新口號係「冇民主，冇問責；要普選，要監察」，唔好浪費一眾高官幫忙「催谷」市民上街嘅一片苦心。
「將成班人冲落廁所」
有民陣成員同八方講，今年多咗十幾個副局長、政治助理幫手「造勢」，入境處處長白韞六又出口術針對異見人士，所以對7.1遊行人數樂觀，佢又指特首辦主任陳德霖可能係遊行眾矢之的，事關陳德霖喺副局長風波中惹起公憤，既對國籍危機視而不見，又乘機安插自己親信建立馬房，連同林D9，堪稱遊行「孖寶」，號召市民上街居功不小。
年年7.1都會整件道具上街嘅古思堯話畀八方知，佢已開工整棺材，今年更會打孖上，「一副7.1用，另一副細嘅，留畀（國家副主席）習近平。」習近平7月初訪港，阿古話屆時會抬棺材遊行，要求平反六四，追究屠城責任。因應陳德霖近日成為新聞人物，阿古話考慮整個馬桶做遊行道具，送畀陳德霖贈興。
阿古指喺副局長風波中，陳德霖作風又硬又臭，黑箱作業不特止，仲要匿埋唔敢去立法會解畫，所以整個馬桶諷刺佢，「最好將成班人冲晒落廁所，順番市民條氣。」陳德霖一干人等，可以激發幾多人上街，泛民方面態度審慎，民主派議員聽日會開記者會，民陣星期日會搞花車巡遊，泛民未來一星期會總動員呼籲市民上街。
泛民大搞7.1，反觀政府就低調好多，去年慶祝回歸10周年有煙花滙演，今年就冇嘞，地區層面都靜英英冇乜搞作，有地區人士話，各區早前搞迎接奧運聖火活動時已勞民傷財，加上四川地震，捐款賑災都令唔少富豪荷包減磅，如果再揼佢哋心口籌錢搞7.1慶典，無異係強人所難，所以今年宜冷處理慶回歸活動，工聯會今年都唔搞7.1巡遊，畀時間大家休養生息，留力到8月奧運時先重鎚出擊。
mailto:[email protected]