【本報訊】為抵擋禽流感襲港，政府堅持日日清雞，勢必令大量雞販被迫結業。家禽業零售商昨達成共識，決定企硬賠償金額，即05年自願交牌計劃的十倍。但食物及衞生局局長周一嶽質疑賠償過高，「通脹呢幾年有冇十倍呢？」今日雙方談判料將陷入僵局，業界不排除上街抗議。
周一嶽昨晚表示，業界預料日日清雞將打擊生意，傾向考慮結業，涉及零售至農場層面，「如果係結業，肯定係全線。」但他強調，賠償來自公帑，終極方案必須獲社會及立法會認同，「通脹呢幾年有冇十倍呢？呢個大家都知道。」當局又正考慮提早中央屠宰。雙方今早開會，商討賠償方案及農場雞隻囤積問題。
港九新界家禽批發零售商會主席黃偉泉表示，昨與代表政府街市販商的港九雞鴨行職業公會開會，根據過往八年休市清潔日的損失，連同人工及牌費，鐵定爭取十倍賠償，但不便公佈詳細計算方法，「我哋條數計得好清楚，但係𠵱家唔想畀政府睇底牌。」
「農場就有百五萬隻籌碼」
他又指，停售雞隻至今約十天，業界已損失4,000萬元，「零售商都仲交緊租，政府係想鍊死我哋，但係業界好團結，唔會畀佢整死。我哋冇晒雞，抗議都冇得放，農場就有百五萬隻籌碼，佢哋做乜，我哋都會支持。」新界養雞同業會副理事長李良驥揚言，若業界不滿政府賠償方案，不排除示威抗議，「呢啲係身家性命財產，一定要上街。」
香港活家禽批發商會會長徐名團表示，初步建議按過去七至十年的平均營業額作賠償基數，「日日清雞根本冇得做，香港人應該從此告別活雞。我咁後生，又唔識做其他嘢。唔做食乜？」