一年前嘅噚日,佢臨危受命,要挽救一手創辦嘅公司,佢係雅虎CEO楊致遠。
07年6月18日楊致遠重掌雅虎,話咁快一年,過去一年雅虎市值唔見咗17%,公司除咗要面對人才流失,仲有微軟收購戰。為咗保住一手湊大嘅「親生仔」,楊致遠戲劇性選擇同另一對手Google合作。
喺重掌雅虎一周年嘅日子,《財富》雜誌想搵楊致遠做訪問,可惜雅虎拒絕安排,但有總裁SusanDecker接受訪問,佢話:「CEO絕對係正確時嘅正確選擇。」仲讚楊致遠「對公司非常忍耐,係雅虎嘅夢想家。」楊致遠揸住市值12億美金嘅雅虎股票,Decker話,對楊致遠處理微軟提出收購方案同之後嘅餘波,印象深刻,而且仲好有信心話:「楊致遠對雅虎嘅發展方向堅定不移,有充份嘅決心同動力去實現目標。」但《財富》引述咗雅虎一位前高層好無奈咁話:「每次楊致遠提出新計劃都係聲勢浩大,過後就無聲無息,我對管理層已經失去信心。」