大鱷索羅斯老貓燒鬚，大陸股神林園就損手。據大陸《成都商報》報道，內地稱為「陽光私募」嘅私募信託基金，損失嚴重，林園管理嘅三隻信託基金──林園1期、2期同3期，除咗１期成立時間較早，保得住唔使蝕之外，2期同3期呢兩隻基金發行至今年3月短短半年內，淨值就分別縮水18.87%和19.23%。報道話，截至5月中，後兩隻基金嘅單位淨值分別係76.85蚊同76.76蚊，相信6月份嘅淨值會得唔夠70蚊，甚至跌穿60蚊㖭。
林園同深國投合作嘅第一隻信託產品林園1期，舊年2月底成立，到10月中時，曾公佈收益率53.28%，但同期上證指數漲幅有108%。至於林園2期同3期就喺07年9月發行，門檻由1期嘅50萬人仔提高到100萬銀，但07年底止投資全部損手。究竟「股神」之名係言過其實定時勢唔就？