唔知係唔係近排忙於同雅虎傾合作嘅緣故，Google高層貴人善忘，華華噚日睇大陸《第一財經日報》報道，自汶川地震發生後，有11家公司承諾合共捐2億銀賑災，其中兩大美資巨頭，Google同連鎖百貨公司沃爾瑪分別拍心口話捐1700萬人仔（下同），略盡綿力。不過，目前為止都只可以話係口頭承諾。
保證會兌現承諾
地震過咗個幾月，商務部新聞辦公室公佈話，直到6月13號為止，Google只係得500萬銀捐款到位，沃爾瑪就得400萬cash加100萬實物捐咗出嚟。換言之，兩間公司都仲有成約1200萬未到位。認咗頭但未有實際行動嘅，唔止呢兩間公司，根據公佈，有幾間公司更加連影都唔見埋。
事出必有因，Google解釋係要按程序做事，沃爾瑪話要根據重建進度捐助，仲保證會兌現承諾，不過華華最關心嘅係，身處水深火熱嘅災民幾時先完全感受到嗰份「企業責任」呢？