莎莎（178）成立30周年，由30年前只得40平方呎嘅櫃位，做到家陣市值四十幾億嘅上市公司，主席郭少明應該感觸良多。華華問佢有乜感想，佢劈頭第一句，「多咗好多白頭髮！」果然做美容生意，講感受都同「靚」有關。郭少明仲話，30年對佢夫婦嚟講唔係短日子，但呢段時間，睇住公司每日成長好開心，多咗白頭髮都值得。
郭少明同華華講，嚟緊會舉行連串活動慶祝30周年，包括做善事為長者「扮靚」，又搞購物抽獎，一於與眾同樂。咁會唔會派多啲特別股息畀股東，等股東都一齊開心吓先？郭生話，特別股息年年都派，今年都一樣，但因為就嚟公佈業績，派幾多唔講得住。