噚日立法會房屋事務委員會會議，議員陳婉嫻忽然想起自己十幾年前置業時，唔覺意買咗間縮水樓，間屋建築面積明明話500幾呎，點知搬入去至知實用面積得300幾呎。
近來嫻姐諗住換樓，一家人去新樓睇示範單位時，發現實用面積依舊呃秤，特別係間睡房連大床都放唔落，瞓覺連對腳都伸唔直，所以即場向參與會議嘅地產建設商會執行委員會副主席梁志堅大興「問罪之師」，話難怪𠵱家年輕一代越嚟越唔鍾意啲地產商。
堅叔即刻還擊：「發展商冇你講到咁冇良心，起樓係根據用家需求，間屋面積自然會有大有細。不過唔理係大屋定細屋，睡房點都可以擺到張大床，唔使屈起對腳嚟瞓覺！」