政府高層成日話香港係好安全嘅城市，點知入境處新任「一哥」白韞六偏偏唱反調，前日開記者會時透露，有情報顯示唔排除恐怖分子會喺奧運期間嚟香港搞破壞，白sir呢番「恐襲奧運」論經傳媒報道後，最驚嘅唔係市民，八方聽聞保安局同警方最震驚，因為恐怖襲擊情報向來係最高機密資料，絕對唔會輕易向外披露，白sir貿貿然爆料，後果可大可小。
外國通訊社跟進報道
官場二五同八方講，相關部門前日一聽到白sir發表「恐襲奧運」論後已心知不妙，因為官方對奧運保安有統一口徑，就係「暫無情報顯示，香港會成為恐怖襲擊嘅對象。」白sir有唔同講法，可能引起公眾恐慌，所以有關方面即急謀對策，搵人向傳媒解畫，澄清白sir言論，強調白sir並冇直接指明有恐怖分子來港發動襲擊，希望盡量將事件降溫。
正所謂好事不出門，壞事傳千里，外國通訊社都跟進報道「恐襲奧運」論，令當局不得不漏夜發出正式聲明，指雖然奧運可能有風險，但目前冇情報顯示奧馬可能會成為恐怖襲擊嘅目標，恐襲威脅程度不變，仍屬中等。白sir一番說話，令半個政府倒瀉籮蟹，八方聽聞唔少官員有微言，因為奧運保安事宜應由保安局或警方發言，入境處職責係做好把關工作，唔好添煩添亂。
白sir言論引起風波，港協暨奧委會會長、議員霍震霆都忍唔住批評，「政府同入境處對奧運面對風險言論不一致，出現混亂，有需要檢討。」小霍驚白sir亂噏廿四，多過怕恐怖分子，係因為恐襲言論可能進一步影響奧運馬術賽門券銷情，如果小霍搵人問責，白sir隨時要啃晒啲門券，入境處上下輪流去睇馬術賽都唔奇。睇嚟白sir今次真係禍從口出，唔想重蹈覆轍，八方建議白sir盡快「浪」亁淨把口，擦亁淨棚牙，免得講多錯多。
有多位認識白韞六嘅官員，同埋曾同佢交過手嘅政界人士都話，白sir一向謹言慎行、心思縝密，講嘢好知分寸，唔排除今次係一時失手，加上佢已經升到頂，無後顧之憂自然暢所欲言，亦有人笑言可能要為入境處聘請政治助理，長駐部門隨時拆彈。
mailto:[email protected]