港大外科學系終於改朝換代了！系主任黃健靈掌權逾四分一世紀，冧莊又冧莊，近日終於退下來，由「換肝之父」范上達接替，加上新院長李心平8月履新，醫學院中人期望近年風雨飄搖嘅醫學院有新氣象。
黃健靈為父退位
港大醫學院噚日開會，院長梁憲孫宣佈范上達7月起出任外科學系系主任，做咗26年嘅黃健靈提早唔做。據八方所知，黃健靈早前向同僚透露老父患病，想多啲時間陪父親，所以提前退位讓賢，唔沾手行政事務，只做臨床工作。
月前甫傳出黃健靈擬退下來消息，系內即大玩「估領袖」遊戲，盧寵茂同韋霖兩個名教授都係熱門。范上達獲同僚推選做領導人，可謂眾望所歸，有人指范上達德高望重，否則佢06年因為唔妥黃健靈又再續任，表示劈炮唔撈時，都唔會咁多人出面挽留佢，之不過，針無兩頭利，大教授做咗行政，自然冇乜時間開刀，係病人嘅損失。有外科學系醫生同八方講，系內猛人如雲，范上達呢個位唔易坐，勝在手握財政大權，同只係揸手術刀嘅滿足感不可同日而語。