香港人嘅拼搏精神係出晒名，為咗表揚香港各行各業嘅打工仔，楊千嬅聯同周麗淇（Niki）、王菀之（Ivana）、農夫灌錄咗一隻打氣歌《啦啦誇啦啦》。噚日佢哋出席商台舉行嘅「香港誇啦啦﹗」記者會，率先公佈未來半年會到各行各業打氣，同埋明年2月會舉行音樂會。
千嬅希望有機會嘗試做地產經紀、旅遊領隊同call台接線生嘅工作，等佢可以感受其他行業嘅工作環境。問佢如果可以畀佢重新選擇做邊行，佢又會點揀？千嬅話唔想再做藝人，會揀做番朝9晚5嘅OL。
周麗淇自稱失憶
早前有傳佢間公司嘅老闆林建岳有意收購金牌娛樂，問千嬅知唔知呢件事？千嬅話未聽過呢單嘢，同埋佢覺得藝人之間嘅合作應該冇公司界限，好似側田嘅音樂會都會邀請佢做嘉賓，佢仲強調𠵱家只求開心，就算遇到辛苦同唔開心，只要諗起嗰次大樹壓車頂佢都冇事就會積極番晒。
此外，Ivana話唔做藝人嘅話，會有興趣做室內設計師，同埋佢想買間屋自己設計同裝修，然後轉售賺錢。問到佢位好友張敬軒屋企裝修成點？佢就彈到冇樣嘢好，仲投訴軒仔唔肯聽佢嘅意見。至於喺蘭州拍完兩個月劇返港嘅Niki，佢話終於拍晒唔使再走，馮仁昭笑佢最開心咪係鄭嘉穎囉？Niki即刻扮聽唔到，仲笑住咁話喺蘭州患咗高山症缺氧，搞到𠵱家有局部性失憶同間歇性失聰喎！