我求大俠平時得閒都會打吓機，尤其係玩BioHazard嗰陣，最鍾意用「HeadShot」一槍射爆啲喪屍嘅頭。唔好講喪屍，如果係我哋呢啲凡人俾人「爆頭」嘅話，肯定唔唞番三五七年都起唔番身，但係捷克門將施治爆頭後竟可以守龍，都算係奇迹。不過施治好番之後都冇安樂日子過，前日對土耳其仲甩手送對手出線，連佢自己都話：「我黑到爆呀！」
接波甩手累捷克出局
自從06年施治喺車仔對雷丁嘅英超聯賽事，俾後者中場史堤夫亨特踢「爆頭」之後，總覺得佢嘅表現冇以前咁好。今季對住阿仙奴接漏高波，已經睇到呢道鋼門開始有啲生銹。
前日歐國盃對住土耳其嘅生死戰入面，捷克贏住2:0以為定過抬炸彈，不過施治好似驚死土耳其開唔到下盤咁，臨完場甩手送畀尼赫治掃入，而施治個樣即刻灰晒，變臉速度拍得住川劇大師彭登懷！
比賽完咗之後，施治喺地下喃喃自語，好鬼欷歔。不過佢又真係要為捷克輸波負責嘅，連佢自己接受訪問都話：「我都唔知點解自己會甩手，不過係我搞到捷克出局嘅，我要同全隊講對唔住。」唔知係咪個黑色頭套過晒啲黑氣畀佢，施治又講番今季佢頭頭碰着黑，之前又俾車仔隊友賓希姆踢親個嘴，幾乎毀容，真係衰到冇得再衰：「大佬呀，我今季傷咗4鑊，聯賽盃、英超同歐聯全部輸晒，𠵱家仲整鑊杰嘢我嘆，有冇黑成咁呀？好彩今季已經過去啫！」
我求大俠一向都好欣賞施治呢位鐵漢，佢受傷之後一啲都冇退縮，𠵱家佢又俾人插到爛，但佢仍然好樂觀咁講：「𠵱家唯一高興嘅係，呢個咁黑嘅球季終於都完啦﹗」希望施治下季救多啲好波畀大家睇啦！