去年李司棋同夏雨主演嘅無綫劇《溏心風暴》大收，令到實力派演員紛紛抬頭備受重用，連做足20年綠葉嘅黎耀祥，亦終於有機會喺新劇《新網中人》同遲啲開拍嘅《妻妾成群》擔正做第一男主角。唔單止咁，無綫最近仲有意同祥仔簽經理人合約，搵佢做埋親生仔，無綫一向力捧親生仔，祥仔今次簽埋畀無綫嘅話，年尾嘅頒獎禮自然穩操勝券！
「成數都幾大」
日前馮仁昭打電話向祥仔求證，佢笑笑口話：「TVB係有同我傾過，成數都幾大，自己咁多年嚟未試過，試吓都好。」馮仁昭問祥仔係咪因為見近年TVB班仔仔女女接好多商場騷，搵到盤滿缽滿？祥仔就話：「佢哋真係多咗好多機會搵外快，但自己一向都有接呢啲騷，不過，簽畀TVB，由佢哋安排時間，唔使自己慢慢度，又的確方便好多嘅。」
至於會唔會覺得攞獎機會大好多？好似佢舊年拍嗰套《秀才愛上兵》咁，大有機會攞個「最佳男配角」，對此祥仔話：「都會嘅，但TVB親生仔都有好多，呢方面冇可能個個都照顧得到㗎嘛！」