【本報訊】將代表民主黨出戰9月立法會港島區直選的甘乃威，其「軍師」兼助選團成員黎學廉承認，他和自稱「陳振聰軍師」的朱偉民是相識超過30年的「老同學」，雙方至今仍有緊密商業合作。但他強調，這與他支持甘乃威參選無關，陳振聰未有透過他向甘捐款。民主黨主席何俊仁和甘乃威的參選拍檔楊森則稱，信任甘、黎二人，並對甘參選有信心。記者：林俊謙
自傳出與世紀爭產案主角之一陳振聰拉上關係後，甘乃威昨日在何俊仁、楊森及黎學廉陪同下首次與記者詳談事件，黎學廉並交代他與陳振聰的關係。黎表示，他和朱偉民曾一同在英國修讀法律，五年前已跟由陳振聰出任大股東的宏霸合作，並經朱偉民介紹下親身與陳振聰見面，「佢（陳）係宏霸其中一個大股東，我喺佢個office同佢見過面。」
朱偉民對政治零興趣
黎學廉稱，陳振聰向甘乃威捐款參選的消息傳出後，曾就事件查詢朱偉民，「朱偉民問陳振聰識唔識甘乃威，陳振聰話佢都睇到報紙，但唔知邊個係甘乃威」。黎學廉又指，朱偉民強調對政治「零興趣」，「佢話忙都忙唔切，大把嘢搞，點會得閒去搞呢啲嘢。」
一直向甘乃威參選提供意見的黎學廉又稱，他主要和宏霸在收購合併生意有密切合作，指「作為一個多元化社會，民主黨鼓勵多交朋友，如果我哋唔去交朋友，永遠只同啲同聲同氣嘅人傾偈，民主黨係唔會有發展」。
黎不會避忌為甘助選
他又說，不會因今次事件退出民主黨，或避忌不再為甘乃威助選，但因為他忙於處理本身公司業務，故不會出任甘的競選經理。
對於有指他向甘乃威「獻計」迫走單仲偕，黎學廉未作正面評論，只稱那只屬民主黨正常討論，但承認今次他對民主黨只能派一張名單在港島區出選，以及對黨內第二梯隊「上唔上到位」持強烈意見。
黎學廉又對陳振聰透過他向甘捐款的消息，語帶嘲諷地說：「經過今次之後，我對自己自信增加咗好多，原來我咁犀利，可以一個人搞冧個局，搞到全港民主進程倒退，如果我真係做到咁，我真係好成功。」
甘乃威表示，對其競選團隊有信心，「我對今次參選無任何半點猶豫，無諗過要退位讓賢。」
楊森稱，對有消息指陳振聰向甘乃威捐款「感到詫異」，他曾致電追問黎學廉有否收過陳振聰捐款，「佢多次同我強調，絕對無收過陳振聰的錢」，他相信對方不會受到陳振聰或中方操控。何俊仁說，黎為該黨的章程委員會核心成員，他對黎表示信任，又稱甘乃威今次參選有信心。
特稿：民主黨換人參選機會不大
雖然民主黨普遍不看好甘乃威選情，除有黨員建議改由楊森排名單首名參選，黨主席何俊仁也承認，派出甘乃威出選「唔係最穩陣嘅選擇」，但該黨為顯示世代交替的決心，今次陣前易帥機會不大。但被問及若甘乃威的支持度仍無起色，會否改由其他第二梯隊出選時，該黨則未有排除有關可能性，楊森說：「將來發生乜嘢事好難講，你要知政治嘅嘢，兩三日都可以好大變化，只能夠講我哋𠵱家聽唔到有乜新意見。」
何俊仁表示，該黨派出甘乃威出選港島的決定十分明確，不會有任何動搖，指「民主黨咁多人，唔係咁容易受人威脅得到」，又說：「甘乃威咁多年黨組織、議會同市政局經驗，你點可以話佢無能力。」他強調，該黨最重要是看長遠發展，議席不是一切，「如果你為咗一個議席，而唔去令人覺得加入民主黨係有發展機會，咁呢個黨就無希望。」
甘：參選意欲堅決
楊森則稱，希望市民了解民主黨的團隊精神和決心，又稱相信民主黨可在港島力保一席，「大家唔好太集中甘乃威能唔能夠為民主黨保到呢個議席，因為我哋決定咗，就會全力去做」。他強調，「如果有啲人以為我哋會陣前易帥，就最好改變佢嘅主意，因為我哋係唔會嘅」。甘乃威則稱：「我今次嘅參選意欲，比任何一次選舉都強烈同堅決。」
本報記者