我求大俠啲friend成日將「好腰好腎好男人」呢句嘢掛喺嘴邊，聽落好似冇乜意思咁。不過諗真啲，呢句嘢真係有佢道理，有時候我哋睇波夜瞓或者蒲得多，都feel到個腎有啲虧虧地，要啪番啲冬蟲夏草、杜仲、黃耆補補佢，可以見到個腎係對男人幾咁重要。
大家都知腎虧已經好辛苦，何況要換腎？所以我求大俠就好佩服換過兩次腎嘅克羅地亞前鋒卡斯歷。一直有腎病嘅卡斯歷，喺07年1月曾經接受過第1次腎臟移植手術，但後尾出現排斥情況，到3月嗰陣連佢老豆都要割埋個腎俾佢；好彩第2次手術好成功，令卡斯歷喺半年之後終於可以重返球場，呢個故事真係令好多德甲迷感動。
入球助克國全勝
雖然卡斯歷喺呢場對波蘭嘅「風流波」正選上陣，不過佢成為第1個喺歐國盃史上換過腎嘅球員，仲射入埋喺國家隊首個大賽入球，幫球隊贏1:0，喺小組3戰全勝，真係同NBA名將莫寧同艾利洛呢啲「換腎鬥士」有得揮。
賽後呢位「換腎鬥士」非常之high，話自己好似鳳凰重生一樣咁，佢話：「你哋可唔可以搣下我？我想知我係咪發緊夢呀！而家我直頭覺得好似重獲新生一樣呀！」
教練比歷讚口不絕
卡斯歷嘅故事唔知遲啲會唔會有人搵佢嚟拍返套戲，如果有戲開嘅話，教練比歷應該要分番啲佣，因為佢自己就話成日為卡斯歷嘅病情祈禱咁話喎，仲大讚話：「而家卡斯歷好番之後，已經係最佳嘅前鋒，佢真係好掂！
𠵱家呢隊副選兵打得咁好，搞到我好頭痛，唔知半準決賽派乜嘢球員落場好㖭！」佢番話熟真熟假就真係不得而知，不過卡斯歷嘅經歷就真係好值得嗰啲受少少挫折就想死嘅年輕人借鏡喇！