過多一個月，今屆立法會選舉提名期就開始，各路人馬磨拳擦掌準備出戰，部署喺九龍西出選嘅梁美芬「鼠王芬」最積極，噚日香港專業及資深行政人員協會舉行午餐會，邀請政務司司長唐英年到場演講，八方現場所見，鼠王芬一見到唐英年，就「標」出嚟好似攝石咁攝埋唐英年身邊，佢行動好似老鼠咁靈活，抵佢攝到好位同司長影相。
唐英年月前喺官邸設宴，被指有幫「家臣」林大輝拉票之嫌，兩人噚日又同枱食飯，司長有冇幫人拉票不得而知，不過擬出選工業界嘅林大輝就好風騷，走勻全場派新卡片，有人問佢選情如何，佢詐儍扮懵反問係咪問佢旗下幾匹馬狀態。林大輝旗下四匹馬都以「奇妙」命名，佢話希望9月有奇妙嘅事發生喎。