「食詐糊」唔淨只喺球場、麻雀枱上發生，大戶喺大陸炒A股隨時被吹罰食詐糊，呢句說話相信國際大炒家索羅斯感受最深，事關佢近期短炒A股落咗袋嘅7000幾萬人仔，隨時要攞番出嚟。家陣仲有近4000萬人仔資產俾人封艇，對身經百戰嘅佢嚟講，今次真係老貓燒鬚。
揸唔夠5個月利潤歸公司
索羅斯雖已踏入古稀之年，但仍然活躍於投資界，近年更成為中國大好友，身體力行投資大陸，但佢依然唔改鍾意短炒投機嘅性格，最近仲炒出禍來。根據大陸《每日經濟新聞》講，上星期大陸法院受理嘅首宗QFII違規短炒遭索償官司，主角正是大鱷索羅斯。
今次喺大鱷頭上動土係A股上市公司南寧糖業，話說索羅斯旗下嘅基金管理公司馬丁居里舊年8月以介乎13.48至14.77人仔，買咗南寧糖業5.9%股權，但喺今年1月以18.34至20.45減持絕大部份股權，唔夠5個月嘅短炒，粗略估計為索羅斯帶嚟超過7000萬銀人仔。
不過，根據內地證券法第47條，持有5%以上嘅股東，喺半年內買賣獲利，收益歸公司所有，南寧糖業就係用呢條條例向馬丁居里興訟，實行要喺大鱷個口攞番塊肥肉。
華華唔熟A股運作，都係第一次聽到有關條例，索羅斯之前有冇做足功課，睇清楚遊戲規則先入市，要問佢先知。不過佢𠵱家應該擔心，除咗今次會唔會食詐糊，仲有冇其他食咗入口嘅肥肉被翻舊賬。
電郵：mailto:[email protected]