鄉議局噚日開會，討論9月立法會選舉部署，雖然之前鄉議局主席劉皇發同民建聯副主席葉國謙，因為邊個選區議會功能組別個位有多少爭拗，但唔代表鄉事派同民建聯反目，鄉紳傾完一大輪，仍然決定繼續夥拍民建聯，喺新界西及新界東合組名單出選。發叔解釋，雙方團結先可以贏最多議席，令政府唔敢睇小鄉議局。
新界西方面，走去新界東大埔做區議會主席嘅鄉議局副主席張學明，繼續留守新界西，新界東照舊由劉江華帶隊，不過上屆搭順風車當選嘅李國英，卻放聲氣話唔選，佢個位由邊個補上？八方相信非陳克勤莫屬，而另一鄉紳莫錦貴就繼續排第三。大家唔好以為莫生只係扮演抬轎角色，如果民建聯發威，邊個夠膽排除民建聯連取三席的可能性？