提起韓女的美麗密碼，港女戒唔甩酸葡萄心態，「靠整容之嘛！」然而今天你有本事整到白面鼻高如李英愛，唔執，點知十年後會唔會變到似米高積遜？
大韓美麗寶典，尚有一招叫「做Spa」，三五韓女得閒無事不是結伴唱K，而是肉帛相見桑拿場，圍住排毒講是非，一周怨氣寃屈一次過洗滌。
這，才是別無分號的SeoulSpa之道。
記者、攝影：劉嘉蕙
鳴謝：WSeoul、韓國觀光公社
Beyonce都讚
冇錯，WHongKong陣味已開始飄埋身，WSeoul如何力保不成為過氣舊菜呢？
也許靠個型Spa。
舉凡酒店之Spa，一般都是服侍酒店客的吧，但AwaySpa魅力過人，短短4年間，將首爾市民由江東吸去江南，成為上流社會熱門蒲點。你話靠包裝乜都好，AwaySpa夠人氣，不離一個型字，當其他韓國Spa場都一副白雪雪Clinic格局，AwaySpa設計充滿未來感，線條利落用色大膽，泳池靚到雜誌都要借影相。Spa房方面，則同客人大玩好色，燈光有多段顏色調校，由架步Feel粉紅至詭異Feel慘綠都有得俾你揀。
AwaySpa抵玩，就係追星。以最低消費$972，你有得選擇Beyonce去過間更衣室度換衫，甚至，可能，瞓喺佢瞓過間房入面做Spa、用同一個技師、浸同一個池！
AwaySpa
地址：首爾廣津區廣壯洞21號WSeoul3樓
電話：（82）2-2022-0450
網址： http://www.wseoul.com
爽到攤晒地
開正地鐵龍山站旁邊的DragonHill是首爾市內著名的Spa主題公園，無數韓劇曾在此取景，日本雜誌瘋狂推介。中心基本入場費$75，包桑拿浸浴游水全日任玩。點樣玩桑拿可以玩一日呢？一個字，多。中心內除傳統韓式汗蒸幕，仲有鹽蒸屋、石冰庫、軟玉金字塔蒸氣室、黃土蒸屋等，連浸浴池都有廿幾種，包括只可意會不可言傳之皇室韓方坐浴（又名熏陰），無怪乎男男女女一家大細玩完後全部喺大堂爽到瞓着，一個唔覺意小心踩到人哋隻手哦。
中心還體貼地提供各式按摩及美容服務，客人可自費參加，甚至有得入會打Golf。唔想畀太多錢，可以幫襯小賣部買幾蚊一張Mask，順手坐低食個樓下炭燒房焗出來的炭燒蛋。做完Mask靚靚，可以在場內影相區免費借龍袍坐龍椅拍照留念！
DragonHillSpa&Sports
地址：首爾龍山區漢江路3街
電話：（82）2-797-0001
網址： http://www.dragonhillspa.co.kr
后宮純天然美容
Whoo者，后也，為LG旗下頂級化妝品品牌，價位及地位與SK-II相若。品牌SpaCentre打造的是帝后級美容體驗，室內裝修由電視劇《宮》幕後班底負責；皇后級代言人，是韓國第一美女李英愛。Whoo的豪，不在門面的奢華。它的錢，切切實實花在客人的臉上。中心號稱採用皇室養顏秘方，以東方醫學及草藥為骨架，為客人提供最頂級及天然的護理，跟韓國主流科技美容抗衡。譬如按摩，Whoo就Specific到連技師隻手的溫度都考慮到，在宣傳單張上列為賣點一部份，「36.5℃溫暖的雙手與有節奏感的按摩促進氣血循環……」注意Whoo只開星期一至六，做facial要最少24小時前預訂。
地址：首爾江南區清潭洞31-11
電話：（82）80-022-0303
網址： http://www.whoo.co.kr
後記
今個月去韓國仲可以睇韓牛示威。
比香港03年7.1遊行更大規模的韓牛示威，至今仍未有熄燈收柴迹象。記者此行就有兩次撞到正，晚上9點半都有示威人士在酒店樓下經過。示威隊伍態度平和，直行直過或拍照留念其實都唔會有人理你，不過注意交通會出現局部地區性擠塞，搭的士可免則免（事實是部份的士大佬會因此而拒載），建議每朝落街前向酒店人員查詢當日情況，以便作出交通安排。
出門提一提
簽證：持特區護照或BNO毋須簽證。查詢：25294141（韓國領事館）
機票：國泰航空來回首爾，價錢$2,640起。查詢：21088888（康泰旅遊）
酒店：WSeoulWalkerhill單人房$1,720起查詢： http://www.wseoul.com
貨幣：1,000韓圜兌7.48港元（所有價錢已折算為港元）
電壓：220V，兩腳圓插座
下周首爾天晴，17-25℃
