非官守行政會議之中，只剩下鄭耀棠、廖長城、周梁淑怡，梁智鴻與許仕仁五位未係大學校董會主席，另外曾鈺成係立法會議員，按慣例唔可以做，但假如佢今年退出唔競選連任，咁呢位前培僑中學校長大有可能明年代替梁國輝為教院主席。中大就頭痛啲咯；傷腦筋、頭痛之事不如留番畀特首辦想辦法，特首辦主任陳德霖係中大校友，應該為母校諗得周詳啲。
左丁山每逢諗嘢諗到煩，就聽吓古典音樂。星展銀行梁兆基曾對左丁山講過，每日聽莫扎特，會有快樂感覺，係減壓最好方法。又係嘅，左丁山寫稿冇靈感之時，就會在寫字樓開着電腦上網聽香港電台第四台（古典音樂台），一路聽一路Google，好快就會諗到作文題目。呢日Google到飯煲大王蒙民偉為慶祝創辦信興集團五十五周年，邀請三位著名中國音樂家黃蒙拉、呂思清與王健來港演出，七月六日與七月七日兩晚在文化中心登台，由上海東方小交響樂團伴奏。一睇曲目，咦，兩晚都有莫扎特噃，啱晒。七月六日有貝多芬克里奧蘭序曲，黃蒙拉小提琴獨奏孟德爾遜（Mendelssohn）之E小調小提琴協奏曲作品64號，還有莫扎特降E大調第九號鋼琴協奏曲K.271與呂思清獨奏巴格尼尼（Paganini）之D大調第一號小提琴協奏曲作品第六號。呢晚嘅曲目好啱左丁山呢類門外漢，兼且係星期日，大可忙裏偷閒，聽足全場也。至於七月七日之曲目亦有莫扎特，不如請大家上網Google吓。聽講門票甚為搶手，撲票請早。
香港有兩「煲」，同樣出名，一位係煲呔，一位係飯煲王，對小市民嚟講，飯煲王更加實惠，蒙博士在二十世紀五十年代開始代理樂聲牌電飯煲，當時香港人用緊火水爐與炭爐、柴爐煲飯，電飯煲係hi-tech產品，無人睇好。眨吓眼過了五十五年，有邊個香港家庭冇電飯煲㗎，煲王蒙亦因此成為巨富，屢捐巨款助學，今次又捐一千萬去四川賑災，可見做生意係要有視野有長遠目標嘅。
寫呢篇稿之時，從信興集團嘅「Panasonic樂聲弦音獻香江」曲目得到靈感，立即從CD架上搵到一張林昭亮嘅莫扎特小提琴協奏曲CD，聽到心曠神怡，下筆一揮而就。