每年呢個時候都係上市公司搞股東周年大會嘅旺季，華華記得，當年中環富麗華酒店未拆時，好多上市公司會揀喺嗰度搞記者會同股東會，貪交通方便之外，聽啲公關老友講，更大原因係嗰度價廉物美，兼且「成行成市」，特別多記者朋友喺嗰度，一旦遇上家公司「唔夠秤」，記者會場面冷清，可以隨時撈幾個相熟記者老友撐場。
自從富麗華拆咗，咁嘅場面已經不再，不過，聽公關老友講佢哋又搵到第二個場，代替富麗華，新場就係四叔旗下嘅四季酒店。
華華第一個反應係「話晒六星級，唔平喎！」據公關好友講，酒店如其名，「四季」的確「貴」，但由於四季嘅functionrooms全部可以間細，費用亦可以「間細」，至啱搞啲中小型股東會、記者會。加上好多中資公司老總唔係成日落香港見芬佬，趁住股東會約埋班機構投資者喺四季食晏，就腳唔失禮。