房祖名、張繼聰、應昌佑及張致恆等人組成嘅明星隊，噚日到修頓球場參加「四川賑災慈善三人籃球賽」，結果兩場比賽都由明星隊大勝商業機構組成嘅甲一隊，楊千嬅則到場代表聯合國兒童基金會接收支票。
早前千嬅所乘嘅保母車被大樹壓住，幸而冇受傷，佢噚日企喺樹底下接受訪問，突然俾飄落嚟嘅樹葉嚇咗一跳，問到佢係咪因為上次意外，令佢對大樹有陰影？千嬅話好多嘢都係整定，經過上次意外令佢更珍惜現有一切，同埋會盡力去幫人。千嬅又話好多朋友都有打電話慰問佢，當中包括緋聞男友丁子高。
怕俾成龍打傷
另外，對於有報道指上海電影節有外籍記者向成龍挑戰武功，祖名話睇到報道後嚇咗一跳，後來仔細睇咗內容，先知個記者只係講笑，但係佢自己就唔會挑戰爸爸，或者等成龍60幾歲時先同佢打，到時就唔會俾人打到骨折。祖名又話父親節已經預留時間同爸爸食飯，不過就要睇阿爸有冇時間。問祖名會唔會帶緋聞女友薛凱琪一齊慶祝父親節，佢就話大家各有自己老細，佢哋都係各自同自己爸爸慶祝。
