香港仔新盤南灣御園可謂出師不利，發展商未賣先劈價，該盤首批20個單位，原先平均呎價9444元，由於開價比同區樓盤高4成，以致開售以來一直旺丁不旺財，睇嘅多預留嘅少，至日前發展商不得不向現實低頭，減價求售。減價後，首批20伙入場費由506萬元起，呎價7373元，整體平均呎價降至8500元，減幅約一成。對呢個減價盤有興趣嘅就要去現樓睇睇，估計都會幾墟冚。
今日係父親節，唔少商場都有慶祝父親節嘅活動，睇完南灣御園現樓，搭車去小西灣嘅藍灣廣場，同日就有3個活動，其中最有睇頭嘅，非《我的最愛球隊選舉》莫屬。商場為酷愛足球嘅爸爸們，特別搭建咗一個迷你足球場，並仿照真實足球，做咗個三呎高嘅巨型足球，以及一隻長6呎嘅球靴，再以7呎半高嘅足球龍門及人造草皮為背景，令一眾爸爸球迷一圓足球巨星夢。一眾爸爸更可父子兵上陣，只要消費滿100蚊就可以參加選舉，喺歐洲國家盃入圍十六強嘅國家隊中，選出最喜愛球隊，並為球隊創作打氣口號，優秀作品更有機會免費獲贈足球球衣一件。