邊個話港產片冇市場？全球一體化趨勢下，連荷李活都翻拍《無間道》、《見鬼》等香港電影，睇嚟風氣已席捲歐洲球壇，好似上周五晚意大利對羅馬尼亞，梅度12碼「宴客」嘅畫面就突然訊號中斷，令求大俠憶起當年睇嘅《賭俠1999》……
先撇開嗰球12碼應判與否，當球證直指極刑時，畫面瞬間漆黑一片，有聲無畫，同時開住幾部電視嘅求大俠，知道並非單係「現代」有問題，而係幾個電視台（起碼中國地區）都收唔到訊號，仲有某講波佬根據直播比數網站，報道「羅馬尼亞領先2:1」。點知一個屈尾十，「12碼無啦啦變角球」，講波佬亦好醒目更正比數仲係「1:1」，耐人尋味。
緊張關頭訊號中斷
電視重播慢鏡才揭曉真相，原來打開紀錄嘅功臣梅度，操刀12碼怒射中腰波，俾保方手腳兼用擋出，以致演變為後來嘅角球。
此時此刻，求大俠諗起被影迷嘲笑戲謔嘅港產爛片《賭俠1999》，張家輝、劉德華等為引大奸角落叠，前者更扮演朗拿度入波，移花接木，將法國贏3:0變成巴西贏波，唔到你唔服。唔通，外圍莊家學到嘢，企圖藉電視轉播「發功」改寫賽果，引「走地客」落注？好似諗多咗㖭。
作為球迷，喺高潮位先睇唔到畫面，固然氣頂冇癮兼谷住，但不得不提今屆歐國盃主辦國瑞士同奧地利，雖則球隊技不如人，之不過佢哋嘅鏡頭角度之多、慢鏡之精采、以及播放慢鏡嘅時間均值得一讚。今屆慢鏡就捕捉到多個細緻場面，球員「反白眼」、姿整小動作、老波骨如馬基列尼等出術茅招等一覽無遺，觀眾猶如身歷其境，絕對係世界級水平，抵讚！