現代美容（919）老闆娘曾裕，多年來沿用同一代言人──蔡少芬，喺「神愛芬芬」同埋信奉基督教嘅囝囝耳濡目染下，曾裕喺年幾前亦成為基督徒，做咗北角宣道會嘅一分子。咁啱現代美容另外兩位代言人，包括新上場嘅關心妍同張睿玲都係基督徒，唔通相同信仰真係夾啲？
曾裕放假做義工
成為基督徒嘅曾裕，唔係得個「信」字，仲身體力行，名下慈善基金「身心美」喺屯門買咗個單位，面積逾9000方呎，準備同扎根該區15年嘅宣道會合作，開設家庭服務中心，7月至8月期間開幕，為周邊貧苦家庭嘅小朋友，免費提供一餐膳食、補習同埋心靈輔導，曾裕仲同華華講，放假都會去幫手做義工。
曾裕愛主程度拍得住蔡少芬，華華提議佢下次記者會時，唔送旗下品牌紀念品，改送袖珍聖經一本，趁機向一班記者傳福音。
拯救準教友婚姻
講開傳道，曾裕信咗主雖然只係年幾時間，但就成功拯救咗準教友一段婚姻，曾裕話，自己曾經離婚，所以用過來人身份打電話畀嗰位女士，叫對方向老公認錯，兩個人有番多啲溝通就自然冇事。嗰對夫婦最後不但和好如初，仲齊齊信埋主㖭。
四川地震，全城傾巢而出賑災，曾裕話，佢本人、旗下基金，同埋上市公司合共捐咗150萬港銀，雖然佢都好想去四川災區探訪，但費事阻住救援人員嘅救災工作，所以諗住半年後先去，希望到時幫到班小朋友，同埋重建時再出一分力咁話。
mailto:[email protected]