股市跌得甘，散戶惟有求神問卜，網友totoyou玩紫微斗數，睇吓自己嘅「錢途」，不過睇完仲唔舒服，佢喺香港討論區上呻：「前排用紫微斗數算吓自己財運，竟然話我因投機傾家。」
黑仔輸錢因洩露天機？
totoyou話係用軟件計算紫微斗數，「但最近真係好黑仔！都唔知黑到幾時，呢度又唔係我一個losemoney，但點解最近咁黑仔？唔通我洩露咗天機？第日都係收吓口，見到個水壩有缺口都唔好咁揚啦！」
原來討論區上有唔少紫微斗數「專家」，有網友更話可以幫totoyou再算一次，ricochet2046語重心長話：「師兄，學術數第一課：君子問禍不問福。」有人信玄學，但龜人掌就覺得，「信唔信係閣下嘅事，但我選擇信玄學──至奇。」紫微斗數華華唔識，只係覺得炒股千祈咪瞓身，如果唔係求神拜佛都冇用。