【本報訊】「大仔蘇永雄35歲，73年出世；個女蘇依莉，細兩年，當年英女皇訪港，特登改咗呢個名……」，今年父親節對51歲的蘇文成（別名阿B）別具意義，因為他有一個願望，就是找回一對子女。
35年來從未過父親節的阿B是個積犯、釋囚，「只要聽到佢哋講句『父親節快樂』，就已經好開心喇！」他在網上多個討論區留言，可是音訊全無，亦到過子女們住過的荃灣福來邨永昌樓，發現已人面全非，「啲街坊都唔知佢哋搬去邊！」
爭執激死養父
阿B在30幾度炎夏仍穿長袖衫，為的是遮蓋雙臂紋身──「樹欲靜而風不息，子欲養而親不在」，紋在右前臂的兩句詩是要警惕自己：「18歲嗰年，有次同養父爭執，一怒之下將佢對拖鞋掉出街，仲鬧『X街啦你』，點知當晚佢就爆血管死咗！」
由養父母湊大的他，自出娘胎便遭生母遺棄，中學入黑社會，更當上15歲爸爸：「第一任太太叫李明珠，佢大肚嗰時都係得14歲。」兩人先後誕下永雄和依莉，但不久阿B犯事被捕，判監三年。太太亦改嫁，將子女交娘家帶大。
出獄後，阿B繼續活躍黑社會，還當上「紅棍」，其後更染上毒癮。不斷吸毒、入獄，「01年佢哋嚟探監係最後一次見面，個女喊住話：『阿爸今次出返去，唔好再係咁喇，唔係，我唔認你㗎！』」
03年他在廣州涉及54公斤冰毒交易案，被公安拘捕，子女的電話號碼亦因此遺失，連養母病逝都無法送終。
從未有盡父責
兩年前獲釋後決心改過，現時在酒店當清潔工，日薪只得220元，但他笑言從未如此快樂過：「50幾歲人第一次返工，掙到嘅都係安樂錢。」阿B雙眼通紅說：「搞到今時今日咁，都係我一手造成，30幾年嚟都無盡過做爸爸嘅責任。」