由兩個國家合辦大型國際足球賽，可以令更多人受惠於賽事所帶來的經濟效益，但今次每天賽事都梅花間竹地在瑞士及奧地利上演，會考起唔少傳媒行家。
例如，體育網站想覆蓋整個賽事，至少要派4位記者分佈於不同城市，而每次去採訪要坐幾小時火車，好似雷民由維也納去蘇黎世，已經要10個鐘，相比06德國世界盃，最遠程兩個城市，才3小時車程，真係差幾遠。最弊係火車班次冇因應賽事而延長服務時間，點解咁講呢？每晚踢完尾場已經11點，而由瑞士返去奧地利的火車，最後一班係晚上10時40分，要搭尾班車返奧地利，就要提早離場！
雷民試過喺蘇黎世採訪完場波已經冇車返維也納，好在小弟有唔少朋友，好似香港無家者世界盃代表隊領隊陳永柏，雷民遇到無車返酒店，無家者遇上無家者領隊，得到陳生收留，先至唔使去車站過夜。
講起無家者世界盃，香港已經派隊參賽過3次，今年年底會喺澳洲舉行，到時陳生又會同社工一齊帶隊盡點綿力。
文：雷民