前日見到希臘輸俾俄羅斯0:1，個個都話呢支衞冕球隊好失禮，仲講到佢哋小組出局好似好大件事咁，唔下半旗都抒發唔到嗰種悲痛嘅心情。講真句，一開始都冇人預今屆希臘會掂，加上衞冕球隊幾乎屆屆「瀨嘢」，而家佢哋出局又使乜大驚小怪呢？
希臘前日輸咗俾俄羅斯之後，成為歐國盃史上第一支分組賽連輸兩場嘅衞冕球隊，令佢哋係歐國盃史冊上又加多項紀錄。
衞冕失敗只係繼承傳統
不過講到希臘好似咁唔掂咁，其實佢哋都未算最衰，88年衞冕嘅法國連決賽周都入唔到，邊個更加唔掂先？仲有近7屆嘅歐國盃入面，7支衞冕球隊，更有5隊喺分組賽出局。
講返場波，我求大俠見到希臘班球員輸波後一啲唔開心都冇，教練列哈格喺比賽期間仲得閒同球迷簽吓名，同上屆喺場邊狂爆樽嘅佢真係完全唔同晒！連佢自己都話，如果個個星期都有「神奇球隊」彈出嚟，咁佢哋都唔會畀人叫做神話啦，神話至少要30年出現一劑先至似樣㗎嘛！
老實講句，希臘上屆已經攞晒彩，夠俾人講足一世。喺同一屆賽事內兩次擊敗主辦國葡萄牙，又隊冧咗冠軍大熱嘅法國，拎咗國家足球史上第一個重要錦標，而家輸畀瑞典同俄羅斯咪當還債囉；況且都叫力戰下出局，尼高普尼廸斯同安沙斯仲可以乘機宣佈退出國家隊。我係列哈格同希臘班友仔都覺得冇所謂啦。