美國次按風暴，拖累大藍籌滙豐（005）股價跌到殘，網友乜都得架將滙豐同英超球隊利物浦相提並論，話兩者除咗老家都喺英國，仲有一項相似嘅地方，就係「光輝已成過去，王者已成追憶了。」
唔係球迷嘅你，聽Firecanner講就知點解，佢話：「（利物浦）成日輸盤嗰隊。」Franky129亦話：「若要生活好，勿買利物浦（指滙豐）。」
講開滙豐股價唔生性，賭仔姓賴，mpchan就話：「唔到你唔信，自從拆咗舊天星碼頭之後，滙豐就開始行衰運。」不過有啲網友唔認同，14號話：「滙豐長hold必然之選。」20071001贊成，「收息都夠。」經常上香港討論區嘅kin5395133話，「呢度好多滙豐fans，有着對滙豐嘅情義結，邊個敢唱淡就會俾人圍攻。」乜都得架建議：「反買滙豐咪ok囉！」但killer2628覺得咁做又太高風險。