估唔到副局長、政治助理嘅新聞，死唔斷氣，曾特首道歉之後，議員繼續追打，金牌詹仲要伍潔鏇及盧奕基辭職㖭，或者由政府主動毀約，賠人工又點話，前議員飛天朱亦加入戰圈，指政府低B到極，令佢感到香港管治出問題，再係咁搞落去，佢會移民。
詹培忠唔高興伍潔鏇呢位新加坡國籍女士，並唔出奇，因伍小姐好似冇受過傳媒訓練，對住鏡頭說話太高音，面部表情似乎表示不屑、不忿氣，彎梗啦！至於飛天朱不滿副局長係外國籍，有跡可尋嘅，朱老兄三十年前自美國回港，係由美國銀行以Expat身份派返嚟嘅，即今日陶傑筆下之中環精英最高層，佢讀過MIT，係哈佛MBA，拿美國護照，到香港做海外僱員，幾威風呀。一直到佢後來要競選議員，我哋先知道佢放棄咗美國籍。咁巴閉之人都唔珍惜美國護照，你班副局長做乜全無政治觸覺呀？難怪飛天朱以前精英身份，感到非常勞氣。佢話移民喎，即係返老家啫。
曾特首就唔得閒勞氣，已去了美國旅行，聽官場消息人士講，曾特首都唔知幾輕鬆，放心放權去下邊，大小事情有政務司、財政司及各問責局長做晒，副局長之事則由特首辦主理，今年曾先生仲會有十次八次出外旅行，推銷香港國際城市，為香港建立國際形象，等閒日常事務，唔好驚動佢，既然四年後就落莊咯，學習列根總統之辦事方式，有益身體健康，最緊要係班司長局長生性。
曾特首放心放權（delegate），其中一項就係盡量委任行政會議成員做大學校董會主席與主要機構主席，例如夏佳理做港交所主席，張建東做機管局及科技大學主席，梁振英做滿六年嶺大主席又移去城大做主席，陳智思做嶺大主席，羅仲榮做理大主席，查史美倫就做掌握大學撥款嘅UGC教資會主席，張炳良做教育學院院長，明年（09年）有中大校董會主席鄭維健，教育學院主席梁國輝兩人做滿六年，港大馮國經已經超過六年，係時候換人嘞，睇走勢會由行政會議成員代替之，范鴻齡似係代替馮國經嘅熱門人選，浸大王英偉未夠鐘，中大與教院由邊個做好呢？