早喺EURO開波前嘅「英超世界」節目，睇過克羅地亞教練比歷（Bilic）嘅訪問，雷民當時仲以有人幫佢配音㖭。內容大致講當年踢英超嘅點滴同埋國家隊嘅轉變，最特別係有講佢平日好鐘意夾band，仲係一位出色嘅結他手。由於訪問有講到音樂，所以小弟對比歷多咗一份親切感，覺得大家志趣相投。當真係見到佢出席記者招待會嗰陣，佢嘅動作亦都好有rock友感覺，眼神充滿憤怒。
堅拒用英語回答記者
記者知佢英語講得好，就叫佢用英語回答問題，點知畀佢當場拒絕咗，佢解釋話其他國家隊教練都用本國語言，呢樣係對國家嘅尊重，死都唔講英文；好彩佢都有將出場嘅11個球員話畀記者知，等佢哋唔駛左問右問。
比歷果然有性格，雷民更加鍾意你！但之後到雷文提問就出事喇，小弟問佢有冇帶同佢嘅搖滾樂嚟到「音樂之都」維也納，比歷竟然話如果我想知，就開波前一個鐘去更衣室搵佢，大家到時講個痛快，令我feelhappy咁話。
開波前搵佢，點敢呀？不過記招完畢後，比歷親自行埋我面前畀張卡片我，話一定會同我慢慢講音樂，又唔似發火喎。總言之比歷真係有性格，可以被封為「摩連奴第二」！
此欄見報之時，小弟已回歸香港，有機會再見！
雷民
nowSports主持